„Gaman og gefandi að keyra lög­legan kapp­akstur“

Eina GoKart-leiga landsins er staðsett á svæði bílaklúbbs Akureyrar við Hlíðarfjallsveg. Í blíðskaparveðrinu sem hefur blessað Akureyringa fyrri hluta sumars hafa viðtökurnar verið ansi góðar að sögn Hákonar Gunnars Hákonarsonar, eins eigenda leigunnar.

„Þetta hefur gengið mjög vel. Í júní var rosa gott veður. Viðtökurnar hafa verið mjög góðar og héðan fer enginn ósáttur. Það er bara gott að koma til Akureyrar og fara í GoKart,“ segir Hákon. 

Þetta er ekki í fyrsta sinn sem Hákon opnar GoKart-leigu en hann var einnig einn þeirra á bak við leigu sem starfrækt var við skautasvellið á Akureyri árin 1996 og 97.

„Ákváðum tveir úr þessum hóp að það væri bráðnauðsynlegt að opna þetta aftur í bænum. Við vorum í þessum bransa í gamla daga og höfum áhuga á kappakstri. Þetta er leiðin að koma því út til fólks, það er alltaf gaman og gefandi að keyra löglegan kappakstur,“ segir Hákon. 

Þegar fréttastofu bar að garði hafði rignt um morguninn og þá ekki hægt að keyra.

„Það er ekki hægt að keyra á sléttum dekkjum á blautu yfirborði, það er ekkert grip. Það er bara lokað þegar það er blautt. Við tökum stöðuna oft á dag og opnum um leið og mögulegt er,“ segir Hákon.