Öfga­hægri­menn helsta hryðju­verka­ógnin og engin merki um íslamska öfga­menn

Þetta segir Runólfur Þórhallsson, aðstoðaryfirlögregluþjónn hjá greiningardeild ríkislögreglustjóra, í samtali við Morgunblaðið. Heilt yfir sé hryðjuverkaógnin minni á Íslandi samanborið við önnur Norðurlönd og þar hjálpi að færri leiðir séu til að komast inn í landið. Á móti komi að mannekla innan lögreglunnar og skortur á lagaheimildum geri íslensku lögreglunni erfiðara um vik þegar kemur að því að bregðast við hryðjuverkaógn.

Helsta ógnin hér á landi séu hægri öfgahópar. „Að okk­ar mati er hún að ein­hverju leyti til staðar hér. Við verðum að fylgj­ast mjög vel með þeirri þróun, en hún er úti um all­an heim,“ seg­ir Runólfur í samtali við Morgunblaðið.

Fleiri ábendingar berist en áður vegna öfgahægrimanna. Meðal annars frá erlendum samstarfsaðilum um að þeir hafi séð íslenskar tengingar á spjallborðum á netinu þar sem öfgahægrimenn eigi samskipti.

Haft er eftir Runólfi að lögreglan hafi aldrei fengið mál inn á sitt borð sem tengist íslömskum öfgamönnum búsettum á Íslandi.