Belling­ham hetjan í upp­bótar­tíma

Real Madrid og Union Berlin eru í C-riðli Meistaradeildarinnar ásamt Braga og Napoli. Berlínarliðið er í fyrsta sinn í riðlakeppni Meistaradeildarinnar en Real Madrid er sigursælasta lið keppninnar.

Real Madrid var betra liðið í leiknum í dag. Liðið sótti mun meira og Mato Joselu og Rodrygo áttu báðir skot í markrammann í upphafi síðari hálfleiks.

Það var þó ekki fyrr en á fjórðu mínútu uppbótartíma sem eina mark leiksins kom. Að sjálfsögðu var það Englendingurinn Jude Bellingham sem var þar að verki en hann hefur verið sjóðandi heitur í upphafi tímabils með Real Madrid.

Gríðarlega svekkjandi fyrir Union Berlin sem fer því stigalaust heim til Þýskalands.