Ármann tók sín fyrstu stig á tímabilinu gegn Blikum

Leikurinn fór fram á Anubis, en sá leikvangur virðist vera í einkar miklu uppáhaldi hjá spilurum Ljósleiðaradeildarinnar. Leikmenn Ármanns tóku hnífalotuna og völdu að spila fyrri hálfleik í sókn, en í fyrstu umferð töpuðu þeir gegn Þórsurum eftir slaka frammistöðu í sókn á Anubis.

Þó var ekki að sjá neinn slappleika hjá leikmönnum Ármanns sem spiluðu sóknina af mikilli yfirvegun og sigruðu fyrstu þrjár loturnar. Blikar héldu þó í við mótherja sína og jöfnuðu leikinn í 3-3. Ármann fór þá að spila harðari sókn og virtist einbeita sér að því að taka sprengjusvæðin sem fyrst, en leikplön þeirra báru svo sannarlega ávöxt þegar þeir tóku sjö lotur í röð og komu stöðunni í 3-10. Blikar náðu þó að sigra eina lotu til viðbótar í fyrri hálfleik.

Staðan í hálfleik: 4-11

Blikar virtust ætla að taka fyrstu lotu seinni hálfleiks en leikmenn Ármanns sýndu mikla yfirvegun og tóku 16. lotuna. Áfram hélt sigurganga Ármanns en þeir komust í stöðuna 4-15 í seinni hálfleik þar sem leikmenn liðsins deildu fellunum bróðurlega á milli sín. Blikar þurftu því að sigra hverja einustu lotu til að knýja fram framlengingu. Blikar tóku næstu 4 lotur en leikmenn Ármanns bundu hins vegar enda á leikinn í lotu 25.

Lokatölur: 8-16

Ármann eru nú komnir með sín fyrstu stig en þeir eru efstir í miðjuslagnum með +6 í lotumismun. Blikar þurfa hins vegar að sætta sig við sitt annað tap í deildinni en aðeins ÍBV hefur einnig tapað báðum sínum viðureignum.