Sex Ís­lendingar hafa horfið er­lendis undan­farinn ára­tug

Að sögn Karls Steinars Valssonar yfirlögregluþjóns hjá Ríkislögreglustjóra eru ekki margir Íslendingar sem týnast á erlendri grundu, en þó koma upp nokkur slík mál á ári hverju. Þetta kom fram í viðtali við Karl Steinar í Reykjavík síðdegis þann 18. september síðastliðinn.

Vitað er um fimm tilfelli þar sem Íslendingar hafa horfið erlendis undafarinn áratug, fjórir karlmenn og ein kona.

Friðrik Kristjánsson

Ár: 2013

Land: Paragvæ

Friðrik Kristjánsson hvarf sporlaust í Paragvæ fyrripart ársins 2013, þá þrítugur að aldri. Fyrstu fregnir af hvarfi hans bárust í apríl það ár en þann 31. mars hafði Friðrik tvisvar sinnum reynt að hringja í fjölskyldu sína, á innan við tíu mínútum, án árangurs. Var hann á flugvelli í Brasilíu á leið til Paragvæ. Eftir það náðist aldrei í hann aftur.

Lögreglan óskaði í framhaldinu eftir aðstoð Interpol til þess að finna Friðrik og var þá talið að hann væri staddur í Paragvæ eða Brasilíu. Eftirgrennslan bar þó ekki árangur.

Í gegnum árin hafa verið uppi háværar sögusagnir um að hvarf Friðriks tengist skipulagðri glæpastarfsemi. Þær sögusagnir hafa þó aldrei staðfestar af lögreglu. 

Í janúar árið 2014 sagði fréttastofa Stöðvar 2 frá því að talskona alþjóðalögreglunnar Interpol í Paragvæ hefði sagt lögregluna á Íslandi gruna að íslenskur maður hefði orðið Friðriki Kristjánssyni að bana í Suður-Ameríku, en Friðrik hafði verið á ferðalagi í heimsálfunni þegar hann hvarf.

Snert var á hvarfinu í meiðyrðamáli fyrir dómstólum árið 2019.

Í byrjun apríl 2021 birti Vilborg Einarsdóttir, stjúpmóðir Friðriks, færslu á Facebook þar sem hún biðlaði til fólks sem vissi eitthvað um hvarf Friðriks að stíga fram og segja frá.

Í færslunni segir Vilborg að í gegnum árin hafi margt komið fram sem hafi hjálpað fjölskyldunni og lögreglu við rannsóknina á hvarfi Friðriks. Þær upplýsingar hafi hins vegar ekki veitt nein svör við spurningunum um það hvar Friðrik sé niður kominn.

Þorleifur Hallgrímur Kristínarson

Ár: 2014

Land: Danmörk

Þann 16. desember 2014 birtust fréttir í íslenskum fjölmiðlum þar sem lýst var eftir Þorleifi Hallgrími Kristínarsyni, tvítugum Íslendingi, sem þá hafði verið týndur í Danmörku í fjóra daga. Þorleifur var staddur í heimsókn í bænum Fredrikshavn og hafði farið út að skemmta sér á föstudagskvöldið.

Síðustu skilaboð Þorleifs áður en hann hvarf voru til vinkonu sinnar er hann yfirgaf veitingastað í bænum rétt eftir klukkan sex að morgni laugardags. Hann sagðist þá vera á leið heim til hennar.

Upptökur öryggismyndavéla sýna mann sem svipar til Þorleifs klifra yfir girðingu við höfnina í Fredrikshavn snemma á laugardagsmorgni. Kristín Hildur Þorleifsdóttir, móðir Þorleifs greindi frá því í viðtali við DV í febrúar 2017 að til væri myndband þar sem Þorleifur sést ganga að bryggjusporðinum í Fredrikshavn og síðan stökkva út í opinn dauðann. 

Í viðtalinu rakti hún jafnframt sögu sonar síns, en Þorleifur hafði glímt við mikið mótlæti í lífinu og var að sögn Hildar komin á vonarvöl. 

„Hann var búinn að fá nóg. Hvert sem hann sneri sér þá rakst hann á veggi og hann gat ekki meira.“

Hala Mohamed Zaki Ibrahim

Ár: 2016

Land: Egyptaland/Reykjavík

Í mars 2017 greindi Vísir frá því að íslenskrar konu, Hala Mohamed Zaki Ibrahim, hefði verið saknað í tæpt ár. Hala var fædd í Egyptalandi en hafði búið á Íslandi í mörg ár og var íslenskur ríkisborgari. Hún starfaði sem leiðbeinandi á leikskóla.

Lýst var eftir Hala á vef Interpol í nokkurn tíma, að beiðni fjölskyldumeðlima, en það bar ekki árangur.

Í svari lögreglunnar á höfuðborgarsvæðinu kom fram að ekki væri uppi grunur um saknæma háttsemi og að lýst hafi verið eftir Hala að beiðni fjölskyldu hennar. Málið væri úr höndum LRH þar sem talið væri að Hala væri stödd í Egyptalandi. Á vef Interpol kom hins vegar fram að Hala hefði horfið á Íslandi.

Haukur Hilmarsson 2018

Ár: 2018

Land: Sýrland

Haukur Hilmarsson ferðaðist til Sýrlands árið 2017 og gekk til liðs við alþjóðadeild hersveita Kúrda undir stjórn YPG. Hann tók þátt í orrustunni um Al-Raqqah það sama ár. Í mars 2018 var tilkynnt að Haukur hefði fallið í loftárás tyrkneska hersins í Afrin í Sýrlandi 24. febrúar það sama ár.

Tyrkneskir fjölmiðlar fullyrtu að Tyrkir myndu senda lík hans heim en tyrknesk stjórnvöld hafa ekki fengist til að staðfesta að þau viti hvar líkamsleifar hans sé að finna eða hvernig þau geti fullyrt að hann sé látinn. Líkamsleifar Hauks hafa aldrei fundist.

Jón Þröstur Jónsson

Ár: 2019

Land: Írland

Hinn 41 árs gamli Jón Þröstur Jónsson gekk út af hótelherbergi sínu laugardagsmorguninn 9. febrúar 2018, og út á götur Whitehall-hverfisins í Dublin. Hann var hvorki með síma, veski né vegabréf. Hann sást á öryggismyndavél fyrir utan Highfield-hjúkrunarheimilið fyrir aftan hótelið upp úr klukkan 11. Þá var Jón Þröstur á gangi upp Swords Road, klæddur í svarta úlpu að reykja sígarettu. Síðan hefur ekkert sést til hans.

Jón, fjögurra barna faðir, var ásamt unnustu sinni í ferðalagi í Dublin til þess að skoða kastala og taka þátt í pókermóti.

Umfangsmikilli leit að Jóni Þresti var strax hrundið af stað og skyldmenni hans hafa mörg verið með annan fótinn á Írlandi síðan. Í desember 2019 kom fram að að Anna Hildur Jónsdóttir, systir Jóns Þrastar, og Jana Guðjónsdóttir, unnusta Jóns, hefðu ráðið írska einkaspæjarann Liam Brady til að rannsaka hvarfið.

Í október 2020 var fullyrt í frétt Sunday Independent að Jón Þröstur hefði verið myrtur fyrir slysni af öðrum Íslendingi vegna deilna um peninga sem töpuðust á pókermóti. Tengiliðir fjölskyldunnar vísuðu þessum upplýsingum hins vegar á bug.

Lögregla á Írlandi hefur farið með rannsókn málsins sem enn í dag er óupplýst.