Dusty jók forskot sitt á toppnum

Leikmenn stilltu sér upp á Anubis þar sem NOCCO Dusty hóf leikinn í vörn. FH-ingar tóku skammbyssulotuna í byrjun og fengu snöggt forskot með að taka aðra lotuna sömuleiðis. Dusty keypti riffla í þriðju lotunni og fann þá loks sína fyrstu sigurlotu.

Dusty tók fyrri hálfleikinn svo föstum tökum og gaf FH-ingum ekkert eftir. FH náði eingöngu að sigra þrjár lotur til viðbótar í fyrri hálfleik þar sem Dusty réð öllum hreyfingum á vellinum. Pandaz, leikmaður Dusty, leiddi fellutöfluna með 17 fellur í fyrri hálfleik.

Staðan í hálfleik: 10-5

FH þurfti kraftaverk til að koma sér aftur í leikinn, en loturnar sem FH sigraði í fyrri hálfleik voru ekki sigraðar með miklum yfirburðum. Dusty hóf seinni hálfleikinn í takt við þann fyrri, en þeir sigruðu fyrstu tvær loturnar áður en FH tók lotu númer 18. Staðan þá 12-6.

FH-ingar sáu þó aldrei til sólar eftir sinn sjötta lotusigur, en Dusty sigraði allar lotur nema eina sem eftir lifði leiksins. Sóknin þeirra var snögg og markviss, sprengjan fór niður trekk í trekk og FH-ingar reyndust ekki hafa svörin sem þeir þurftu.

Lokastaða: 16-7

Dusty situr því enn á toppi deildarinnar ósigraðir og nú með tíu stig, en þeir eru eina liðið sem hefur náð þeim árangri. FH situr enn í sjötta sæti deildarinnar með fjögur stig og færast þeir nú neðar í miðjuslagnum.