Hér má heyra lagið:
Kynlíf og heimspólítík
„Lagið fjallar í senn um kynlíf og heimspólitík og er sungið frá sjónarhóli stúlku sem sér ekki sólina fyrir ástinni, sér ekki út fyrir eldhúsgluggann af losta og þrá jafnvel þótt heimurinn þar fyrir utan sé á heljarþröm,“
segir í fréttatilkynningu.
Ef marka má textann vilja meðlimir hljómsveitarinnar stunda kynlíf og það ofan á eldhúsborði.
„Eins og Kvikindunum einum er lagið er söngurinn berskjaldaður um leið og tónlistin byggir undir hann haglega smíðaða kraftballöðu sem myndi sóma sér vel í stórum sal í Kópavogi. Þetta er fyrsta lagið sem við fáum að heyra af nýrri breiðskífu sem kemur út á næsta ári,“ segja meðlimir sveitarinnar.
Eiginmaðurinn og bleikt ský
„Í aðra röndina fjallar þetta lag um Matthías eiginmann minn með mjög bókstaflegum hætti. Á sama tíma fjallar það almennt um bleikt ský sem gerir böl heimsins að bakgrunnstónlist,“ segir Brynhildur Karlsdóttir söngkona.
Ásamt Brynhildi er Kvikindi mynduð af Friðriki MargrétarGuðmundssyni og Valgeiri Skorra trommara.
„Það verður alltaf til óvæntur og einstakur efniviður þegar við Brynhildur hittumst, slúðrum og spreytum okkur á hljóðverinu. Það liggur beinn strengur frá hjartanu, í hljóðnemann og að takkaborðinu í þessu tilfelli,“ segir Friðrik MargrétarGuðmundsson.
Lagið verður flutt á Iceland Airwaves tónlistarhátíðinni ásamt fleiri lögum þeirra Kvikinda. Þau stíga á sviðið Airwaves Center í Kolaportinu í kvöld 2. nóvember klukkan 18:30. Lagið er aðgengilegt á öllum helstu streymisveitum.
