Rory McIlroy sagði af sér

McIlroy er næstefstur á heimslistanum í golfi en hann sendi nefndarmönnum bréf í gær þar sem hann tilkynnti þessa ákvörðun sína. Ástæðan er bæði persónuleg sem og faglegs eðlis samkvæmt heimildarmönnum bandarískra fjölmiðla.

Menn eru auðvitað fljótir að tengja þessa ákvörðun McIlroy við það að bandaríska mótaröðin fór í samningaviðræður við höfuðandstæðing sinn á markaðnum.

McIlroy var alltaf mjög harður gagnrýnandi sádí-arabísku LIV mótaraðarinnar og hann vissi ekkert af því að PGA og LIV væru að semja á bak við tjöldin.

6. júní var það tilkynnt að PGA væri að ganga frá samkomulagi við Sádana sem höfðu þá keypt til síns marga af bestu kylfingum heims, stórstjörnur eins og þá Dustin Johnson, Brooks Koepka, Bryson DeChambeau og Phil Mickelson. PGA bannaði þessum LIV kylfingum að keppa á sínum mótum en nú breyttist það allt skyndilega.

McIlroy viðurkenndi á blaðamannafundi í kringum þessa tilkynningu að þessar fréttir væru áfall fyrir sig enda hafði hann talað gegn LIV allan tímann.

„Þegar þú ert að tala um einn af stærstu peningasjóðum heims viltu þá ekki frekar vera í samvinnu heldur en að vera óvinur? Þegar upp er staðið þá tala peningarnir og þú vilt frekar vera í samvinnu við slíka menn,“ sagði McIlroy á þeim tíma.

„Það er erfitt fyrir mig að sitja hér og líða ekki eins og lamb sem hefur verið leitt til slátrunar. Mér finnst eins og ég hafði sett höfuð mitt að veði og að þetta séu launin,“ sagði McIlroy.