Endur­flytja of­beldis­mál í héraði vegna seina­gangs dómara

Samkvæmt lögum um meðferð sakamála á þess vegna að endurflytja málið, nema að dómari eða aðilar máls hafi talið það óþarft.

Fram kemur í dómi Landsréttar að hvorki hafi verið bókað að flytja þyrfti málið að nýju eða að aðilar málsins teldu það óþarft. Þá segir að ekki hafi legið fyrir skrifleg yfirlýsing um að aðilar máls hafi ekki talið þörf á endurflutningi máls. 

Samkvæmt því var skilyrðum laga um meðferð sakamála ekki uppfyllt við uppkvaðningu dómsins og því komst Landsréttur ekki hjá því að ómerkja áfrýjaða dóminn og vísa málinu aftur heim í hérað til löglegrar meðferðar og dómsálagningar.

Dómur var upprunalega kveðinn upp þann 11. nóvember árið 2022 og skotið 8. desember sama ár til Landsréttar, af ríkissaksóknara.

Fékk sex mánaða óskilorðsbundinn dóm

Málið varðar ofbeldisbrot manns gegn fyrrverandi sambýliskonu sinni en hann hafði í héraði verið dæmdur til sex mánaða skilorðsbundinnar refsingar auk þess sem hann var sviptur ökurétti í þrjú ár.

Maðurinn var ákærður fyrir stórfellt brot í nánu sambandi, nauðgun og hættubrot, með því að hafa endurtekið og á alvarlegan hátt ógnað heilsu og velferð þáverandi sambýliskonu sinnar. Þá var hann ákærður fyrir ýmis eignaspjöll en hann skemmdi ýmsan fatnað í eigu fyrrverandi sambýliskonu sinnar, tölvu og myndavél. Umrætt atvik eru sögð hafa átt sér stað árin 2017 og 2018.

Hann var sakfelldur fyrir að hafa beitt konuna líkamlegu ofbeldi á heimili þeirra þar sem hann hellti á hana kaffi, sparkaði í klof hennar og hrinti henni þannig að hún féll. Þá var hann einnig sakfelldur fyrir að hafa stofnað lífi hennar í hættu með því að aka á bifreið hennar. Hann var sýknaður af ákæru um nauðgun og annað líkamlegt ofbeldi. Hann játaði eignaspjöll.

Ófyrirleitin framkoma

Fram kemur í dómi héraðsdóms að hann kannist við ákveðin atriði sem hafi verið borin undir hann í skýrslutöku, þá árið 2018, en ekki við það að hafa beitt konuna líkamlegu ofbeldi.

„Hann kannaðist við að hafa beitt hana andlegu ofbeldi og að hafa verið virkilega orðljótur og stjórnlaus í samskiptum við hana. Þá viðurkenndi hann þá háttsemi sem honum er gefin að sök þann 6. nóvember 2018 og jafnframt að hafa eyðilagt tiltekna muni í hennar eigu af ásetningi.“

Í niðurstöðu dómsins segir að meðal gagna málsins séu samskipti milli ákærða og brotaþola sem afrituð voru úr síma brotaþola.

„Samskiptin liggja fyrir í málinu en sérstaklega voru dregin fram í rannsóknargögnum þau sem áttu sér stað á tímabili ákæru. Þau samskipti sýna svo ekki verður um villst hversu ófyrirleitin framkoma ákærða var gagnvart henni. Sú framkoma var einhliða af hans hálfu og til þess fallin að brjóta hana niður andlega.“