„Hann var bók­staf­lega að deyja í höndunum á okkur“

Í byrjun árs 2022 birtist viðtal við Hrein Heiðar í kvöldfréttum Stöðvar 2 og á Vísi. Tilefnið var að hann hafði á rúmum sólarhring annars vegar bjargað ungum dreng úr sprungu á Þingvöllum og tekið þátt í björgunaraðgerðum þar sem kona hafði villst af leið á Lyngdalsheiði um miðja nótt.

Í tilefningu til manns ársins á Vísi kom nafn Hreins Heiðars upp. Reyndist hann hafa bjargað enn einum úr lífsháska á þessu ári, en í mars bjargaði hann gömlum vinnufélaga sem hafði lent í vélsleðaslysi á Langjökli.

Slasaði maðurinn reyndist vera vinur hans

Þann 25. mars var Hreinn staddur ásamt félaga sínum, Smára, í jeppaferð á Langjökli. Tvö stór útköll urðu þann dag á svæðinu.

„Það var fjórhjólaslys fyrr um daginn, en það var svo langt í burtu að við náðum ekki að koma okkur að slysinu,“ segir Hreinn í samtali við Vísi.

Hann var staddur inni í íshelli þegar hringt var í hann og honum tjáð að það hafi orðið slys í klettum skammt frá og hann beðinn um að fara til að aðstoða.

Við setjum allt í botn og brunum þangað.

Þegar félagarnir komu á slysstað sáu þeir manninn á brúninni efst uppi á fjallinu. Þegar þeir komu að honum reyndist þetta vera vinur þeirra sem staddur var í vinnuferð. Hann hafði runnið til í hálku á sleðanum og endað á grjóti.

„Það var alveg augljóst að hann var mjög alvarlega slasaður,“ segir Hreinn.

„Hann var með átta brotin rifbein öðrum megin og sprungið milta. Þetta var bara mínútuspursmál, hann var bókstaflega að deyja í höndunum á okkur.“

Ekkert annað í boði en að setja undir sig hausinn og klára þetta

Hreinn er meðlimur í björgunarsveit og því vanur að koma að slösuðu fólki. Hann segist horfa á slík útköll sem verkefni en þetta tilfelli hafi verið öðruvísi.

„Þegar maður áttaði sig á því að þarna væri vinur manns varð þetta aðeins erfiðara. En það var samt bara ekkert annað í boði en að setja undir sig hausinn og klára þetta.“

Félagarnir kölluðu til þyrlu Landhelgisgæslunnar og hlúðu að manninum á meðan þeir biðu eftir aðstoð. Hann var fluttur á sjúkrahús þar sem hann dvaldi í nokkra daga en hefur í dag náð fullum bata. 

Hér að neðan má sjá myndband af vettvangi.

Hefur ástríðu fyrir því að hjálpa fólki

Ásamt því að vera í björgunarsveit byrjaði Hreinn nýlega í slökkviliðinu. Hans ástríða felst í að hjálpa fólki.

„Maður vill auðvitað geta hjálpað alltaf, öllum stundum. Það er einhvernveginn þannig sem maður vill vera og ég reyni mitt besta í því. Framundan er bara að bæta við sig áframhaldandi kunnáttu í því.“

Þú virðist oft vera réttur maður á réttum stað?

„Tja já, ætli maður sé ekki bara á of mörgum stöðum?“