Snýr aftur á golfvöllinn eftir heilaskurðaðgerð

Ingvi Þór Sæmundsson skrifar 10. janúar 2024 15:00

Gary Woodland fagnar sigrinum á Opna bandaríska meistaramótinu sumarið 2019. getty/Christian Petersen

Gary Woodland, sem vann Opna bandaríska meistaramótið 2019, er að snúa aftur á golfvöllinn eftir að hafa gengist undir heilaskurðaðgerð.

Æxli fannst í heila Woodlands í maí í fyrra, skömmu eftir Masters-mótið. Æxlið var fjarlægt með aðgerð í september. Síðan hefur hann verið í endurhæfingu.

Woodland virðist vera búinn að ná góðum bata því hann ætlar að keppa á Sony Open á Hawaii á morgun. Það er fyrsta mót hans síðan í ágúst í fyrra.

„Ég vil ekki að þetta verði ljón í veginum fyrir mig. Ég vil að þetta ræsi ferilinn aftur af stað. Þú getur komist yfir ýmislegt í lífinu. Ekki er allt auðvelt. Þetta kom upp úr þurru en ég læt þetta ekki stöðva mig,“ sagði Woodland.

„Þegar öllu er á botninn hvolft er ég hér því ég trúi því að ég hafi fæðst til að gera þetta; spila frábært golf. Ég vil gera það aftur. Ekkert mun stöðva mig. Ég trúi því að góðir hlutir séu handan við hornið.“

Woodland lék á 24 mótum í fyrra og endaði tvisvar sinnum meðal tíu efstu manna. Hans stærsta stund á ferlinum var þegar hann vann Opna bandaríska fyrir fimm árum.

Golf