Hetja Fíla­beins­strandarinnar greindist með krabba­­mein fyrir einu og hálfu ári

Haller skoraði sigurmark Fílabeinsstrandarinnar þegar liðið vann Nígeríu, 1-2, í úrslitaleik Afríkumótsins í gær. Fílbeinsstrendingar lentu undir í leiknum en Franck Kessie jafnaði á 62. mínútu og níu mínútum fyrir leikslok skoraði Haller svo sigurmarkið.

Þetta var stór stund fyrir Haller sem greindist með krabbamein í eista í júlí 2022. Hann sneri aftur á völlinn í febrúar í fyrra og núna, ári seinna, tryggði hann þjóð sinni þriðja Afríkumeistaratitil sinn.

Haller er fæddur í Frakklandi og lék fyrir yngri landslið Frakka. Árið 2020 ákvað hann hins vegar að spila fyrir landslið Fílabeinsstrandarinnar. Hann hefur leikið 26 landsleiki og skorað tíu mörk.

Tvö þeirra komu á Afríkumótinu en Haller skoraði eina mark leiksins þegar Fílabeinsströndin vann Kongó, 1-0, í undanúrslitunum. Haller missti af öllum þremur leikjunum í riðlakeppninni vegna meiðsla en sneri aftur í útsláttarkeppninni.

Haller, sem er 29 ára, leikur með Borussia Dortmund. Hann kom til liðsins frá Ajax 2022 en þar áður lék hann með West Ham United.