Sögu­legur sigur en svekktur að fá ekki mynd með Tiger

Matsuyama var sex höggum frá toppnum fyrir lokahring mótsins en hóf hann á því að ná í þrjá fugla í röð. Á seinni níu holunum fékk hann svo heila sex fugla og endaði á að vinna mótið með þriggja högga forskot á næstu menn, þá Will Zalatoris og Luke List.

Sigurinn er sögulegur og kærkominn fyrir Matsuyama því hann er þar með orðinn sigursælasti Asíubúinn í sögu PGA-mótaraðarinnar, með níu sigra. Það er einum sigri meira en K. J. Choi frá Suður-Kóreu.

Sigurinn tryggði Matsuyama auk þess litlar fjórar millljónir Bandaríkjadala í verðlaun, eða rúmar 550 milljónir króna.

„Að ná níu titlum var eitt af stóru markmiðunum mínum, og að komast upp fyrir K. J. Choi. Eftir áttunda sigurinn hef ég verið að glíma við bakmeiðsli. Oft leið mér eins og að ég myndi aldrei vinna aftur. Ég átti í erfiðleikum með að enda í hópi tíu efstu og ég er mjög glaður með að hafa tekist að vinna í dag,“ sagði Matsuyama.

Tiger Woods hætti vegna inflúensu

Stærsta golfstjarna sögunnar, Tiger Woods, neyddist til að draga sig út úr mótinu á öðrum degi vegna veikinda. Þetta var fyrsta PGA-mót hans síðan á Masters á síðasta ári en Tiger tók skýrt fram að inflúensan hefði stöðvað hann í þetta sinn, ekki meiðsli.

Tiger er gestgjafi Genesis Invitational mótsins en veikindin komu í veg fyrir að hann gæti heiðrað Matsuyama eftir sigurinn.

„Ég er svolítið vonsvikinn yfir að hafa ekki getað tekið mynd með Tiger í dag,“ sagði Matsuyama sem fékk hins vegar hlýja kveðju frá Tiger á samfélagsmiðlum, þar sem sá síðarnefndi skrifaði:

„Óska Hideki til hamingju með ótrúlegan sigur á Genesis Invitational. Ég horfði í allan dag og það var alveg einstakt að sjá 62 högga methring og sigur eftir að hafa verið sex höggum frá toppnum.“