Settist í öll sæti Eldborgar og tók 5000 sjálfs­myndir

Martin var ekki að nýta sér stafræna tækni við gerð mynda sinna heldur settist hann í öll sæti Eldborgar til að taka myndir, sem tók hann tvö heil kvöld. Teknar voru um 5000 myndir til að skapa eina víðmynd úr salnum eins og sjá má hér.

Martin hefur tekið samskonar myndir í ýmsum heimsfrægum tónlistar- og ráðstefnuhúsum og er Eldborg nú komin í hóp þeirra.

Í fréttatilkynningu segir að það sem sé sérstakt við list Martins er að hann býr til víðmyndir (e. panorama) úr fjölmörgum myndum frá sama sjónarhorni þar sem hann situr sjálfur fyrir.

„Martin hefur tekið myndir í fjölmörgum þekktum tónlistar-, óperu- og leikhúsum víðs vegar um heiminn þar sem hann situr fyrir í hverju einasta sæti salarins sem gestur og einnig sem stjórnandi og tónlistarmaður. 

Hann setur svo myndirnar saman í eina stóra panorama mynd. Hann líkir eftir því sem gestir sjá þegar þeir horfa yfir salinn, á stjórnandann og tónlistarfólkið og nær hann tilfinningunni þar sem myndavélin er sífellt að breyta um stefnu. Martin starfaði í mörg ár sem kvikmyndasýningarstjóri og elskar að búa til undarleg sjónræn áhrif mynda með fagurfræðilegum hætti.“

Hér má sjá myndband af tökuferlinu: 

„Það var mögnuð reynsla fyrir mig að fá að skjóta í Hörpu. Á tveimur kvöldum tóku ég og aðstoðarmaður minn um 5000 myndir. Salurinn Eldborg býr yfir stórkostlegu og kraftmiklu andrúmslofti með einstakri litapallettu sinni og stórfenglegu rými,“ segir Martin um þessa reynslu.

Myndin var notuð á sýningu Martins í hinu virta Martin Asbæk gallery í Kaupmannahöfn í lok síðasta árs en sýningin fékk fimm stjörnur í Politiken.