Upp­lifir alls ekki að for­ysta VG sé ekki nógu sterk

Orri Páll Jóhannsson þingflokksformaður Vinstri grænna ræddi stöðuna við Sindra í Kvöldfréttum stöðvar 2. 

„Það virðist vera að við náum ekki í gegn með okkar áherslur og árangur í því sem við höfum verið að gera. Sem við auðvitað tökum alvarlega þegar við sjáum þessar tölur,“ segir Orri, aðspurður hvað valdi þessum niðurstöðum. 

Hann sagði málið hafa verið rætt á flokksráðsfundi fyrir fréttatímann, og hvað sé hægt að setja á oddinn og herða upp á. 

Aðspurður segir Orri vel kunna að vera að fólk sé óánægt með þær ákvarðanir sem þingflokkurinn hefur tekið, til dæmis í atvinnumálum, orkumálum og útlendingamálum. 

„En þetta er eitt af því sem við ræddum á okkar fundi, það er að segja að fara að rifja nú upp grunnstefin okkar, sem lúta meðal annars að menntamálum og heilbrigðismálum og umhverfis- og náttúruverndarmálum. Við höfum svo sem ekki þagað í því samhengi,“ segir Orri. 

Hann segir ekki hafa komið til átaka á flokksráðsfundinum. „Þetta var ofsalega góður og skemmtilegur fundur og vel mætt og góð stemning.“

En burt séð frá því?

„Við gerum okkur alveg grein fyrir því að þetta er staða sem við þurfum að herða upp á og var auðvitað til umræðu á okkar flokksráðsfundi. En það er enginn bilbugur.“

Heldurðu að fólk sé jafnvel óánægt með forystuna, þingmennina, fólkið í flokknum, hverjir það eru sem að fronta málefnin?

„Það kann vel að vera. En við skulum heldur ekki gleyma því í samhengi við að við höfum auðvitað verið að vera að streða hér við verðbólgu, sem að þó að hún fari niður á við þá gerist það hægt og rólega,“ segir Orri. 

Hann segir sömu þróun sjást í nágrannalöndunum, að stjórnvöld eigi að missa fylgi í samhengi þess þegar fólk er að streða. „Og ég hef fulla trú á því að við náum árangri í þessu samhengi og erum að því.“

Þannig að þú sérð fyrir þér að ef þið haldið áfram að streða þá náið þið inn á þing næst þegar kosið verður?

„Það verður auðvitað að koma í ljós hvernig kosningar fara. En ég tel að við eigum mikið inni þegar kemur að, sér í lagi, vinstrinu. Í samhengi þeirrar pólitíkur og þeirra áherslna sem við höfum lagt áherslu á. Og við erum hvergi farin.“

Menn hljóta samt að horf á þessar tölur og hugsa, forystan er ekki nógu sterk, ráðherrarnir eru ekki nógu sterkir?

„Ég sjálfur upplifi það alls ekki þannig, að forystan okkar og ráðherrar séu ekki sterkir. Og það var ekki að heyra eða finna á félögum mínum í flokksráði um helgina um að síður væri. En staðan heilt yfir, af því að þú spyrð í upphafi, hvað heldurðu að valdi? Ég held að við séum augljóslega ekki að ná í gegn með þær áherslur og þann árangur sem við höfum náð á þessum tíma við ríkisstjórnarborðið og í meiri hluta á þingi. Og við þurfum að finna leiðir í því.“

Aðspurður í lokin segist Orri ekki hafa leitt hugann að því hvort hann hefði áhuga á að verða formaður flokksins. „En ég er auðvitað þakklátur þeim félögum í þingflokknum sem treystu mér fyrir verkefninu að vera þingflokksformaður og hann er áberandi, eðli málsins samkvæmt,“ segir hann.