Ís­lendingar dug­legastir í heimi að kaupa Samsonite-ferðatöskur

„Okkur hjá A4 finnst auðvitað frábært að fá að vera í samstarfi við Samsonite og selja þessar vönduðu vörur, en við fögnum tuttugu ára samstarfsafmæli með þeim á þessu ári. Samsonite er einn stærsti ferðatöskuframleiðandi heims og hefur verið frumkvöðull á mörgum sviðum, til dæmis kom fyrsta ferðataskan á hjólum úr smiðju Samsonite. Það má með sanni segja að það hafi verið bylting fyrir ferðalanga sem þurftu ekki lengur að halda á ferðatöskunum hvert sem þeir fóru heldur gátu farið að draga þær áfram.“

Samsonite leggur mikið upp úr umhverfisvernd og liður í því er til dæmis að framleiða endurvinnanlegar ferðatöskur úr endurunnu hráefni. Útkoman er Roxkin™ sem er þróað af Samsonite og meðal annars notað í Proxis-línuna. 

„Proxis-töskurnar eru flaggskipið hjá Samsonite, enda eru þær algjörlega einstakar,“ segir Elín. „Ytri skelin er úr Roxkin™ sem er þeim eiginleikum gætt að vera ákaflega sterkt en létt og ef skelin beyglast, t.d. ef einhver tekur upp á því að standa ofan á töskunni, þá er hægt að ýta skelinni inn aftur svo hún nái sínu venjulega formi. Þar fyrir utan eru Proxis-töskurnar svakalega flottar og hafa vakið mikla athygli, enda hafa þær selst eins og heitar lummur og allir helstu áhrifavaldarnir farnir að ferðast með þær. Svo má ekki gleyma því að Proxis-töskurnar eru 100% endurvinnanlegar, sem okkur hjá A4 finnst skipta mjög miklu máli þegar kemur að umhverfisvernd.“

Talandi um umhverfisvernd, þá hlýtur fólk líka að vera orðið meðvitaðra um að þótt gæði og ending kosti ef til vill aðeins meira borgi það sig til lengri tíma litið, ekki síst einmitt fyrir náttúruna okkar og framtíðina?

„Akkúrat, fólk er farið að gera sér grein fyrir því að það er verið að kaupa tösku sem getur jafnvel enst út ævina. Það kannast eflaust margir við það að ætla að spara með því að kaupa ódýra ferðatösku en eru í raun að spara aurinn og henda krónunni þar sem taskan nær líklega ekki að verða langlíf og hennar ferðalag endar á ruslahaugunum. Hjá Samsonite er líka hægt að fá varahluti þannig að taskan er ekki endilega ónýt þótt eitt hjól brotni, oft er einfaldlega hægt að fá nýtt hjól. Á töskunum er líka framleiðsluábyrgð og á Proxis er til dæmis tíu ára framleiðsluábyrgð þannig að ef galli kemur fram sem orðið hefur til við framleiðsluna, tekur Samsonite ábyrgð á því.“

Ferðatöskur alltaf vinsælar og klassískar gjafir

Elín segir að ferðatöskur frá Samsonite hafi verið vinsæl gjafavara um árabil, bæði fyrir ungu kynslóðina og þá eldri. 

„Að gefa ferðatösku í til dæmis fermingargjöf, útskriftargjöf eða brúðargjöf er auðvitað alltaf klassískt og þar hafa bæði Proxis- og StackD-töskurnar frá Samsonite komið sterkar inn. Mörgum finnst fátt skemmtilegra en að ferðast og ekki er verra að ferðast með fallegar og vandaðar töskur. Hægt er að fá töskur í ýmsum stærðum og gerðum, úr mjúku efni og með harðri skel.

Ferðatöskur með harðri skel verða sífellt vinsælli, enda eru þær endingargóðar og sterkar en svo eru þær líka svakalega flottar og til í mörgum fallegum litum. 

Það er algengur misskilningur að töskur með harðri skel séu þyngri en mjúku töskurnar og það komist minna í þær.

 Þannig var það kannski fyrir einhverjum árum síðan, en eftir því sem þróuninni og tækninni hefur fleytt fram eru hörðu töskurnar jafnvel orðnar léttari en þær mjúku, og auk þess eru þær margar líka stækkanlegar svo það kemst mjög mikið fyrir í þeim. Samstarfsfólk okkar hjá Samsonite hefur verið svolítið hissa á því hvað við Íslendingar kaupum mikið af mjúku ferðatöskunum því annars staðar í Evrópu eru hörðu töskurnar mun vinsælli og seljast langtum betur en þær mjúku.

 Ég held að það sé af því að við erum enn svolítið föst í þessari hugsun að hörð skel sé þyngri og það komist minna í harðar töskur en mjúkar, það sé hægt að troða meira í mjúku töskurnar sem kaupglöðum Íslendingum hugnast oft vel,“ segir Elín og hlær létt. „En eins og ég sagði áðan þá er það misskilningur og svo margt hefur breyst á síðastliðnum árum. Það er ekki langt í að við náum öðrum Evrópuþjóðum hvað þetta varðar og hörðu töskurnar taki fram úr þeim mjúku í vinsældum.“

Fingralangir komast ekki langt með smellulásinn

Stuldur úr ferðatöskum hefur færst í aukana og íslenskir ferðalangar hafa ekki farið varhluta af því. Til dæmis hefur það ratað í fréttirnar að margir hafi orðið fyrir barðinu á þjófum á flugvellinum í Tenerife. Og jafnvel þótt töskunum sé læst hafa fingralangir oft náð að stela miklum verðmætum úr þeim. Að sögn Elínar fór umræðan um þessa öldu þjófnaða ekki framhjá henni og kollegum hennar hjá A4 og þau hafi því ákveðið að skoða hvort eitthvað væri hægt að gera til að auka öryggi Íslendinga þegar kemur að farangrinum.

„Við fréttum af því að þeir sem voru með töskur sem ekki voru með hefðbundnum rennilásum, virtust sleppa alveg, eða að minnsta kosti betur, við þjófnaði úr töskunum sem ekki voru með rennilása. Við ákváðum því að skoða málið og höfum nú tekið inn töskur frá Samsonite, MAGNUM ECO, sem er lokað með þriggja punkta smellulásum og þær hafa fengið mjög góðar viðtökur. MAGNUM ECO eru úr a.m.k. 70% endurunnu frauðplasti, mjög sterkar en léttar og meðfærilegar.“

Nú er oft talað um að svartur sé þjóðarlitur okkar Íslendinga, a.m.k. þegar kemur að fatnaði. Er það sama uppi á teningnum í ferðatöskutískunni?

„Já, svarti liturinn er alltaf vinsælastur en við höfum þó séð breytingu á því á undanförnum tveimur árum eða svo. Við erum að verða óhræddari við að nota sterka og skæra liti og það getur líka komið sér vel. Það getur til dæmis verið auðveldara að koma auga á töskuna sína á færibandinu á flugvellinum þegar hún er í áberandi lit heldur en þegar hún fellur í fjöldann innan um svörtu, gráu og dökkbláu töskurnar. Þannig er minni áhætta á því að taka tösku í misgripum, eða að þín taska fari heim með einhverjum öðrum en þér.

 Núna bíðum við spennt eftir skærgræna litnum í Proxis, sem hefur verið mjög áberandi í auglýsingaherferð Samsonite, Tomorrow is here eða morgundagurinn er hér, en hann er væntanlegur í verslanir okkar fyrir sumarið. Svo má líka poppa töskurnar upp með fallegu töskumerki, litríkum ólum utan um þær eða töskuhlífum og öðrum fylgihlutum sem Samsonite framleiðir og eru fáanlegir hjá okkur.“