Víkingur Ís­lands­meistari karla og kvenna í borð­tennis

Í úrslitum kvenna kepptu Sól Kristínardóttir Mixa, Harriet Cardew og Vivian Huynh, lánsleikmaður frá Osló fyrir BH, sem eru ríkjandi deildarmeistarar, gegn Nevenu Tasic, Evu Jósteinsdóttur og Lilju Rós Jóhannesdóttur frá Víkingum.

 Þegar liðin mættust síðast endaði keppnin með jafntefli og kom því nokkuð á óvart í dag að Víkingskonur gerðu sér lítið fyrir og unnu 3-0. 

Þar á meðal vann Lilja Sól sem varð Íslandsmeistari í fyrsta sinn í vor og Nevena vann sterkan sigur á Vivian eftir nokkurra mánaða leyfi frá íþróttinni. Með sigrinum urðu Víkingar Íslandsmeistarar kvenna sjötta árið í röð.

Í úrslitum karla kepptu Pétur Gunnarsson, Norbert Bedö og Ellert Kristján Georgsson fyrir KR, sem eru ríkjandi deildarmeistarar, gegn Inga Darvis Rodriguez, Magnúsi Jóhanni Hjartarsyni og Kára Mímissyni frá Víkingum. 

Þessi spennandi viðureign endaði í oddaleik, og stöðunni 3-2 fyrir Víkinga. Munaði þar mestu um ríkjandi Íslandsmeistarann Inga, sem hefur búið í Svíþjóð undanfarin tvö ár til að æfa og keppa í borðtennis en hann vann tvo af leikjunum þremur.

Úrslit í öðrum deildum

Þá urðu Víkingar jafnframt Íslandsmeistarar í 2. deild karla eftir sigur á HK, BH Íslandsmeistarar í 3. deild karla eftir sigur á BM í Mosfellsbæ og KR Íslandsmeistarar í 2. deild kvenna eftir sigur á BR í Keflavík, fyrr í dag. Þau lið færast því upp um deild næsta haust.