Stjórnar­maður í RÚV segir opin­ber hluta­fé­lög fé án hirðis

Í færslu á Facebook segir Ingvar Smári að hann hafi verið tilnefndur til stjórnarsetu af þingflokki Sjálfstæðisflokksins og hann þakki fyrir það traust sem honum hafi verið sýnt. Hann hafi nú setið í stjórn RÚV í tvö ár en þó með löngu hléi á meðan hann var aðstoðarmaður Jóns Gunnarssonar dómsmálaráðherra.

Nýtti pásuna til að kenna ritstjórninni blaðamennsku

Hann segir að á meðan hann var í pásu frá störfum sínum í stjórn RÚV hafi hann átt í ýmsum samskiptum við fréttastofu stofnunarinnar. Hann hafi reglulega reynt að kynna þá vinnureglu fyrir blaða- og fréttamönnum að það væri skynsamlegt að fá afrit af dómum og úrskurðum í málum fólks áður en skrifaðar eru fréttir sem byggja á einhliða frásögn þess.

„Ég veit ekki hvort fréttastofan hafi tileinkað sér þetta en í þessum efnum vona ég að dropinn holi steininn.“

Ríkisútvarpið upplifi sig sem einkafyrirtæki 

Ingvar Smári segir engan skort góðu fólki innan stofnunarinnar sem og stjórnarinnar. Fólk vinni af miklu kappi við að framleiða framúrskarandi efni, hvort sem það er í sjónvarpi, útvarpi, á vef stofnunarinnar eða á TikTok-rás hennar. 

„Auglýsingadeildin vinnur einnig hörðum höndum að því að afla stofnuninni tekna og stofnunin upplifir sig held ég oft eins og einkafyrirtæki á markaði — eða það er mín tilfinning. Þessi leikgleði sem því fylgir hefur vissulega kosti og galla.“

Afleiðingarnar séu þær að stofnunin er í sífelldri skoðun á því hvernig hún geti stillt upp sjónvarpsdagskránni með það að leiðarljósi að hámarka áhorf og þar með auglýsingatekjur. Stofnunin hasli sér einnig völl á nýjum miðlum og noti þá til þess að kynna efni á hefðbundnu miðlunum sem og hreinlega framleiða efni á nýju miðlunum, svo sem hlaðvörp og fleira. Þegar einstaklingar finni sér nýja hillu í fjölmiðlun sé stofnunin fljót að breiða úr sér og taka sér sæti á hillunni þeim við hlið. 

„Þegar einn aðili hefur svo mikla fjárhagslega meðgjöf getur það verið mjög varhugavert og haft veruleg ruðningsáhrif á markaðnum, sem og er raunin tel ég.“

Lagabreytinga sé þörf ef leggjast eigi í breytingar

Hann segir að ef leggjast eigi í breytingar á fyrirkomulagi Ríkisútvarpsins þurfi að gera það með lagabreytingum. Um stofnunina gildi ákveðin lög og það sé hlutverk stjórnar að hafa í senn eftirlit með rekstri stofnunarinnar og að hún fari að lögum, en ekki að breyta þeim. Hann hafi sínum störfum sem stjórnarmaður reynt að viðhafa það eftirlit sem hægt er og spyrja spurninga, leggja fram fyrirspurnir og þess háttar þegar mál koma upp í umræðunni.

„Eftir sem áður þá fæ ég þá tilfinningu að ohf. fyrirkomulagið hafi skapað of mikla fjarlægð milli stofnunarinnar og eiganda hennar, ríkisins. Þetta á raunar einnig við um fleiri ríkisfyrirtæki held ég, t.d. Landsvirkjun. Stofnanirnar verða að fé án hirðis þar sem þær eru á sjálfsstýringu, bæði fjárhagslega og stjórnunarlega. Ég deili áhyggjum með þingmönnum Sjálfstæðisflokksins og fleirum um að þessi þróun hafi ekki verið til bóta.“