Segja vin­slit hjá Tiger Woods og Rory McIlroy

Þeir Tiger og Rory hafa verið miklir félagar í gegnum tíðina en Golf Digest slær því upp að það séu vinslit hjá þeim.

„Samband McIlroy and Woods hefur versnað mikið undanfarna sex mánuði. Það eru engin leiðindi en þeir hafa ólíka sýn á framtíð golfsins. Það hefur eitthvað komið upp á milli þeirra,“ skrifar blaðamaður Golf Digest og hefur það eftir heimildarmönnum sínum.

McIlroy gekk á sínum tíma mjög langt í að gagnrýna sádi-arabísku mótaröðina en hann er núna opinn fyrir samvinnu, eitthvað sem margir aðrir kylfingar eru enn á móti.

McIlroy telur að eina leiðina til að koma golfinu á rétta braut á nýju sé að fara að vinna saman við að styrkja íþróttina en ekki draga hana niður með deilum og því ófremdarástandi að bestu kylfingarnir séu ekki að spila á bestu mótunum.

Þessi þróun mála sýnir ekki aðeins vinslitin hjá Rory og Tiger heldur einnig þá spennu sem ríkir í golfheiminum vegna kapphlaups PGA og LIV um að tryggja sér bestu kylfinga heims. Aftonbladet fjallar líka um málið.

Í raun lýsa fróðir menn ástandinu sem hálfgerðri ringulreið þar sem kylfingar, mótshaldarar og auglýsendur eru allir að toga í sitthvora áttina. Á sama tíma er hætt við því að vinsældir golfsins dvíni.

Norður Írinn McIlroy var meðlimur í leikmannaráði PGA á sínum tíma en ákvað að hætta þar vegna þess að starfið þar tók að hans mati of mikinn tíma. Nú vildi hann komst aftur inn en fékk neitun.

„Það voru greinilega einhverjir meðlimir í ráðinu sem af einhverri ástæðu leið ekki vel með það að fá mig aftur til baka,“ sagði McIlroy við Golf Digest.

Hann nefndi ekki Tiger í þessu viðtali en Rory vill fara samningaleiðina því annars tapi allir. Patrick Cantlay, meðlimur í ráðinu, er sagður harður andstæðingur þess. PGA og LIV voru sögð ætla að fara samningaleiðina fyrir mörgum mánuðum síðan en lítið hefur frést af þeim samningum síðan.