Skaut á Taylor Swift og sagði konum að halda sig í eld­húsinu

Butker er á meðal bestu sparkara í NFL-deildinni og hefur raðað inn titlum með sterku liði Kansas City undanfarin ár, síðast í febrúar síðastliðnum þegar félagið vann Ofurskálina. Enginn efast um hæfileika hans innan vallarins en utan hans er Butker umdeildari.

Það voru ekki aðeins hlutverk kynjanna sem Butker tjáði sig um í ræðu sem hann hélt við útskriftarathöfn Benedictine-háskóla í Atchison í Kansas. Eftir umdeild ummæli um fóstureyðingar, Covid-faraldurinn og Joe Biden, Bandaríkjaforseta, meðal annars, sneri Butker sér að konunum í salnum.

Hann byrjaði á því að skjóta á söngkonuna Taylor Swift, kærustu Travis Kelce, er hann vitnaði í textabút hennar og kallaði hana „kærustu liðsfélaga“.

„Það eruð þið, konurnar, sem eruð mataðar af verstu lygunum. Sumar ykkar gætu átt farsælan feril en ég þykist vita það að meirihluti ykkar séu spenntastar fyrir hjónabandinu og börnunum sem þið munuð fæða í heiminn,“ sagði Butker sem lýsti því að hann gæti ekki sinnt lífi sínu og ferli án þess að eiga konu sem sinnir heimilinu.

„Það er ekki hægt að ofmeta það að allur árangur minn er mögulegur vegna þess að stúlka sem ég hitti í grunnskóla snerist til trúar, verða konan mín og taka fagnandi við einum mikilvægasta titli allra: Húsmóðir.“

Ummælin féllu eðlilega misvel í kramið, þó að einhver hluti fólks við Benedictine-háskóla hafi tekið þeim fagnandi. Enda um að ræða skóla sem neyddi samkynhneigða körfuboltamanninn Jallen Messersmith til að fjarlægja regnbogafána úr herbergi sínu á heimavistinni.

Butker átti nefnilega eftir að snúa sér að fjölbreytileika og baráttu hinsegin fólks.

„Heimurinn í kringum okkur segir að við eigum að halda trú okkar fyrir okkur sjálf þegar sú trú gengur gegn harðstjórn fjölbreytileikans, jöfnuðar og innsömun,“ sagði Butker sem snerti því næst á hættulegri hugmyndafræði sem fylgdi baráttu hinsegin fólks og Pride-mánaðar sem er í júní.

Hann sagði Pride-mánuð í Bandaríkjunum vera á meðal „dauðasyndanna“. Eina sanna stoltið fælist því að „fylgja Guði og hylla hann“.

Ræðan og hlutar úr henni hafa farið sem eldur um sinu á samfélagsmiðlum og óhætt að segja að viðbrögðin séu víðast hvar neikvæð. Butker er sakaður um karlrembu og fordóma gegn hinsegin fólki. Fjölmargir hafa kallað eftir því að honum verði vísað úr NFL-deildinni vegna smánarlegra ummæla hans.

Justice Horn, fyrrum borgarfulltrúi í Kansas-borg, segir Butker ekki vera fulltrúa borgarinnar og gildanna sem þar eru við lýði.