Af vængjum fram: „Ég er að breytast í dreka hérna með þér“

Þetta er meðal þess sem fram kemur í sjötta þætti Af vængjum fram, nýjum skemmtiþætti á Vísi í tilefni af forsetakosningum. Þar setjast forsetaframbjóðendur niður og gæða sér á sífellt sterkari kjúklingavængjum á milli þess sem þeir ræða lífið og tilveruna í einlægu spjalli. Von er á forsetaframbjóðendum í þáttinn næstu vikur.

Eins og að vera íþróttamaður

Halla Hrund slær á létta strengi í þáttunum. Hún bjó í Boston í Bandaríkjunum í sjö ár og er því öllu vön þegar það kemur að sterkum sósum á kjúklingavængjum. Í þættinum ræðir Halla hvernig henni leið þegar fylgi hennar fór fyrst með himinskautum í skoðanakönnunum.

Þá ræðir Halla líka hvað sér finnist um það að vera sögð eiga erfitt með að svara spurningum með beinum hætti. Hún líkir sér við íþróttamann í þeim efnum og segist stöðugt vera að læra. Hún hafi aldrei verið í stjórnmálum og sé að tala fyrir ákveðinni framtíðarsýn sem snúist meðal annars um að þétta raðirnar.

Halla segir frá vini sínum erlendis sem gengur um með chilli öllum stundum í jakkanum, frá ömmu sinni sem kenndi henni orðatiltækið um að snúa nefinu upp í vindinn. Þá ræðir hún líka sambandsslit, slúðursögur og geirneglir þjóðsönginn svo eitthvað sé nefnt.

Horfa má á fleiri þætti af skemmtiþættinum Af vængjum fram á sjónvarpsvef Vísis.