Fyrstu atkvæðakassarnir opnaðir í Ráð­húsinu

Þá eru fyrstu utankjörfundaratkvæðin í þessum forsetakosningum komin í hús í Ráðhúsinu. Allt merkt eftir kúnstarinnar reglum og mikilvægt að atkvæðin rati á réttan stað. Samanlagt ættu þetta að vera um sex til átta þúsund atkvæði.

Umboðsmenn forsetaframbjóðenda tóku að streyma í borgarstjórnarsal Ráðhúss Reykjavíkur rétt fyrir klukkan hálf ellefu í morgun til að fylgjast með. Eva Bryndís Helgadóttir oddviti yfirkjörstjórnar í Reykjavík tók á móti umboðsmönnunum.

„Nú vil ég bjóða ykkur, biðja ykkur og hvetja ykkur til að fara og skoða innsiglin á öllum þessum kössum. Hvort þau séu ekki heil, áður en þau verða rofin hér á eftir,“ sagði Eva Bryndis áður en hún og samstarfsmenn hennar opnuðu kjörkassana.

Í kössunum voru tæplega tíu þúsund utankjörfundaratkvæði sem greidd höfðu verið frá því utankjörfundaratkvæðagreiðslan hófst á höfuðborgarsvæðinu þar til kjörstað í Holtagörðum var lokað í gærkvöldi. Þetta er því væntanlega bróðurpartur atkvæða sem greidd verða utankjörfundar í borginni enda aðeins þrír dagar til kosninga.

„Það sem er að gerast núna er forvinna, rannsóknarvinna á utankjörfundaratkvæðum. Til þess að spara tíma og koma öllum atkvæðum í réttar kjördeildir,“ segir oddvitinn. En atkvæðaseðlarnir eru í lokuðum og ómerktum umslögum sem síðan eru sett í annað umslag sem er merkt kjósandanum.

Í Reykjavík einni eru rúmlega 90 kjördeildir á 25 kjörstöðum. Fólk sem kosið hefur utankjörfundar getur einnig kosið á kjördag. Eva Bryndís segir því mjög mikilvægt að atkvæðin lendi á réttum stað til að stemma þau af við þá sem kjósa í kosningunum sjálfum. Þannig væri tryggt að enginn kjósi tvisvar.

„Þetta er um sjö hundruð manna teymi sem er skipulagt eins og hér. Algerlega magnað fólk sem er að stýra þessu og alveg niður allt ferlið. Þetta er bara fallegt,“ segir oddvitinn ánægð með sitt fólk.

Þannig að þú segir bara 7, 9, 13 að þetta muni allt ganga vel?

„Já auðvitað. Þetta fer allt vel að lokum,“ segir Eva Bryndís Helgadóttir glöð í bragði.