DeCham­beau hljóp um og leyfði á­horf­endum að snerta bikarinn

DeChambeau tryggði sér sigurinn með því að setja niður fjögurra metra pútt á átjándu holunni. Það hjálpaði honum vissulea mikið að Norður-Írinn Rory McIlroy fékk þrjá skolla á síðustu fjórum holunum. 

Þeir höfðu samt verið að skiptast á um forystuna því DeChambeau átti einnig slæman kafla á hringnum eftir að hafa byrjað daginn í fyrsta sætinu.

Þetta er annar risatitill DeChambeau á ferlinum. „Þetta er risastórt og ein af stærstu stundunum í mínu lífi,“ sagði DeChambeau sem vann opna bandaríska meistaramótið einnig árið 2020.

McIlroy varð aftur á móti í fjórða sinn í öðru sæti á risamóti síðan að hann vann síðast slíkt mót árið 2014. McIlroy klikkaði á pútti á lokaholunni sem gaf DeChambeau tækifæri á því að vinna.

„Rory er einn sá besti sem hefur spilað þessa íþrótt. Að fá að glíma við svo öflugan kylfing er mjög sérstakt fyrir mig. Ég myndi samt ekki óska neinum það að klúðra svona pútti eins og hann gerði á átjándu. Sem betur fer þá féll þetta með því að þessu sinni,“ sagði DeChambeau.

DeChambeau var hoppandi glaður eftir keppnina, hljóp með bikarinn um Pinehurst golfvöllinn og leyfði áhorfendum að snerta bikarinn.

Fréttamenn Sky Sports reyndu að ná viðtali við hann eins og sjá má hér fyrir neðan. DeChambeau hafði þó lítinn tíma í slíkt því hann vildi þakka stuðningsmönnum sínum fyrir.

„Þetta er stórkostlegt en sjáið þetta,“ sagði DeChambeau og fór með bikarinn til áhorfendanna eins og sjá má hér fyrir neðan.