Földu myndirnar af Messi baða sex mánaða gamlan Lamine Yamal

England og Spánn mætast í úrslitaleiknum í Berlín annað kvöld og þar bíða margir spenntir eftir því hvernig guttinn Lamine Yamal fylgir eftir sögulegri frammistöðu sinni í undanúrslitaleiknum á móti Frökkum þar sem hann skoraði stórkostlegt mark.

Lamine Yamal talaði um það í þessu viðtali að fjölskyldan hafi ákveðið það að fela myndirnar því þau óttuðust erfiðan samanburð á honum og goðsögninni Lionel Messi.

Myndirnar eru frá árinu 2007 og þar sést Messi með Lamine Yamal og móður hans Sheilu Ebana.

„Augljóslega vissi ég ekkert hvað var í gangi þegar þessar myndir voru teknar enda enn svo ungur,“ sagði Yamal við Jijantes í gær.

„Pabbi minn passaði upp á myndirnar en þær komu aldrei fram í dagsljósið. Við földum þær því við vildum ekki samanburðinn við Messi,“ sagði Yamal.

„Það er ekki gott fyrir neinn að vera borinn saman við þann besta sem hefur spilað þessa íþrótt. Það væri fljótt farið að vinna gegn þér því þú getur aldrei orðið eins og hann,“ sagði Yamal.

Það þurfti þó ekki myndirnar til þess. Yamal er vinstri fótar leikmaður, með auga fyrir mörkum og stoðsendingum, alinn upp í akademíu Barcelona og kom mjög snemma inn í aðallið Barcelona.

Þegar hann fór síðan að sýna frábær tilþrif inn á vellinum þá voru menn fljótir að bera hann saman við Messi. Xavi, sem gaf honum fyrsta tækifærið með aðalliði Börsunga, reyndi að tala þær niður en viðurkenndi þó að hann sæi ýmislegt í leikstíl Yamal sem minnti hann á Messi.

Yamal er með eitt mark og þrjár stoðsendingar á þessu Evrópumóti en hann er sá fyrsti til að skora á stórmóti (HM eða EM) áður en hann heldur upp á sautján ára afmælið sitt. Strákurinn heldur einmitt upp á sautján ára afmælið sitt í dag.