Níu holu golfvöllur á gamalli landnámsjörð

Golfvöllur vikunnar 15. júlí 2024 12:49

Við Lundsvöll er 120 fermetra klúbbhús með kaffi og veitingasölu sem rúmar 55 manns í sæti. Mikil veðursæld einkennir svæðið og hægt að njóta veitinganna úti a veröndinni.

Lundsvöllur er níu holu golfvöllur staðsettur mitt á milli Vaglaskógar og Lundsskógar í Fnjóskadal, í um 24 km fjarlægð frá Akureyri gegnum Vaðlaheiðargöng.

Lundsvöllur er golfvöllur vikunnar á Vísi en í sumar ætlum við að kynna okkur nokkra af þeim golfvöllum sem spennandi væri að prófa í sumarfríinu. Yfir sextíu golfvelli er að finna víða um land.

Völlurinn liggur á flata fyrir neðan bæinn Lund skammt frá bökkum Fnjóskár en Lundur er gömul landnámsjörð sem Þórir Snepill Ketilsson nam. Einkenni vallarins er mikið berjalyng sem umlykur hann og einnig rennur lækur í gegnum miðjan völlin og hefur áhrif á leik á 5. holum.

Veðursæld á staðnum er margrómuð. Hitastigið er 3-4° hærra en á Akureyri og segja heimamenn enga hafgolu eða þoku ná þarna í dalinn. Við völlinn er 120 fermetra klúbbhús með kaffi og veitingasölu og rúmar 55 manns í sæti. Hægt er að sitja úti á verönd á góðviðrisdögum.

Lundsvöllur er með staðfest vallarmat frá GSÍ.

Golfklúbburinn Lundur GLF er með Lundsvöll sem sinn heimavöll og eru skráðir 88 félagar í klúbbnum. Völlurinn var formlega opnaður 22. ágúst 2009 að viðstöddum 200 manns.

Lundsvöllur er 9. holu golfvöllur, par 35 með gula og rauða teiga og er heildarlengd brauta af gulum teigum 2.426 m og af rauðum teigum 1.967 m. Á vellinum eru 3. par 3 holur, 2. par 5 holur og 4. par 4 holur. Hæðarmunur á hæsta og lægsta punkti vallarins eru 12 m.

Mikil veður- og gróðursæld einkennir svæðið.

Við uppbyggingu á vellinum var fengin aðstoð frá fagmanni sem koma að hönnun vallarins og uppbyggingu. Allar flatir og teigar eru uppbyggð frá grunni og var grasfræjum sáð í þau. Einnig er vökvunarkerfi í öllum flötum vallarins. Lundsvöllur er með staðfest vallarmat frá GSÍ.