Gríðar­legar sviptingar á undanmóti Ís­lands­mótsins í netskák

„Sviptingarnar í þessu móti voru gríðarlegar og úrslitin í raun og veru afar óvænt,“ segir Björn Þorfinnsson, sem lýsti mótinu í beinu streymi á Chess After Dark ásamt þeim CAD-bræðrum Birki Karli Sigurðssyni og Leifi Þorsteinssyni.

„Tveir margfaldir Íslandsmeistarar í netskák, Arnar Gunnarsson og Davíð Kjartansson, þurftu til að mynda að bíta í það súra epli að komast ekki áfram í úrslitin,“ heldur Björn áfram en sjálfur mun hann keppa á mótinu sem einn þeirra þrettán sem boðið var sæti.

Dagur Arngrímsson stóð uppi sem sigurvegari í gærkvöld. Símon Þórhallsson var í 2. sæti og Guðmundur Gíslason í því þriðja. „Verðlaunahafarnir voru vel að þessu komnir,“ segir Björn um þá Dag, sem stóð uppi sem sigurvegari, Símon sem hafnaði í öðru sæti og Guðmund sem náði því þriðja.

„Dagur Arngrímsson tefldi til að mynda af krafti allt mótið og vestfirska kempan, Guðmundur Gíslason, náði að hrista af sér erfiða byrjun og komst í úrslitin með mikilli baráttu og útsjónarsemi.

Maður mótsins var þó eflaust Bosníuvinurinn og Akureyringurinn Símon Þórhallsson, sem tefldi af ótrúlegum krafti og listfengi og skaut mun stigahærri mönnum ref fyrir rass,“ segir Björn og bætir við að spennandi verði að sjá hvernig þremenningarnir spjara sig í úrslitunum. „Og ég er fullviss um að þar verða þeir sýnd veiði en ekki gefin.“

Í fréttt Skák.is er þess getið að fyrirfram hefðu flestir „veðjað á annaðhvort Dag Ragnarsson eða Arnar Gunnarsson enda eru þeir stigahæstir á chess.com skákþjóninum, báðir yfir 2.700 stigum.

Þeir hafi hins vegar ekki komist áfram en Arnar þó líklegast hafa sloppið inn ef Róbert Lagerman hefði „hjálpað honum í lokaumferðinni“ og segja megi að „Róbert hafi því verið örlagavaldur fyrir Arnar, leggur hann að velli (eins og á Borgarskákmótinu) og tapar svo í lokaumferðinni gegn hans helsta andstæðing.“