Ofurstuðningsmaður Chiefs rændi ellefu banka

Sá heitir Xavier Babudar en er betur þekktur sem ofurstuðningsmaður Chiefs þar sem hann kallar sig ChiefsAholic.

Öll lið í NFL-deildinni eiga svokallaða ofurstuðningsmenn sem klæða sig alltaf eins á leikdegi og njóta mikillar athygli fjölmiðla sem og stuðningsmanna.

Þessi var alltaf í stuði á vellinum en utan vallar virðist hann hafa lítið annað gert en að ræna banka. Hann hefur nefnilega viðurkennt að hafa rænt ellefu banka í sjö fylkjum Bandaríkjanna. Hann hafði rúmlega 110 milljónir króna upp úr ránunum.

Þarna kom ástæðan fyrir því af hverju hann gat mætt á alla leiki og líka á Super Bowl. Hann einfaldlega rændi banka og lifði síðan hátt.

Hann mun sitja í steininum næstu sautján ár og á engan möguleika á reynslulausn.