Ís­lenskt hug­vit á að um­bylta golfheiminum

Hjá fyrirtækinu koma saman sérfræðingar í golfi, verkfræði, gervigreind og tölvunarfræði til að setja saman greiningartækið sem samanstendur í grunninn af sex myndavélum, tölvu og spjaldtölvu, sem tengd er við golfhermi.

Þrívíddarmyndavélakerfið greinir sveiflu kylfings og sendir fleiri gígabæt gagna í tölvu þar sem hægt er að greina hvert einasta smáatriði sveiflunnar niður í minnstu öreindir aðeins örfáum sekúndum eftir að bolti hefur verið sleginn.

En í hverju felst nýjungin?

„Við þurfum ekki lengur að hafa merki eða skynjara á líkamanum. En maður getur fengið alvöru þrívíddar-hreyfingarmælingu,“ segir Dr. Robert Neal, meðstofnandi ELVA og lífaflfræðingur.

„Hugmyndin er að gera allt ferlið einfaldara fyrir kylfinginn svo að hann geti fengið rétt viðbrögð varðandi þróun sveiflunnar. Þess vegna er hægt að rekja breytingar. Í staðinn fyrir að segja: Þetta lítur betur út, getur maður sagt: Já, þetta er betra,“ bætir Neal við.

Þægindin séu því meiri. Ekki þurfi að festa skynjara á líkamann til að greina líkamsstöðu og þá fást gríðarmiklar upplýsingar á örskömmum tíma eftir högg.

„Þetta tók um 10 til 15 sekúndur og það fást mjög góðar upplýsingar, líkt og staða boltans, sem er mikilvægt fyrir bæði byrjendur og lengra komn að vera alltaf með sömu stöðu (gagnvart kúlunni)“ segir Grétar Eiríksson, meðstofnandi og PGA kennari, sem sýndi fréttamanni hvernig greiningarvinnan virkar.

Auk þess að greina þá upphafsstöðu greinir ELVA þúsundi smáatriða eftir að kúlan er slegin. Sveiflunni er skipt í tíu meginhluta frá upphafsstöðu kylfings þar til kylfan er komin upp að sveiflu lokinni. Þar er hægt að líta til stöðu handa, mjaðma, höfuðs og fleira.

„Svo er hægt að sjá myndband og þú getur fundið hvern þann stað sem þú vilt skoða betur og hægt að sjá ramma fyrir ramma, hvar þú vilt gera betur,“ segir Grétar.

Andri Ágústsson, sem er golfkennari hjá Golklúbbi Mosfellsbæjar, hefur fengið að kynnast ELVA-kerfinu undanfarna daga.

„Þessi græja getur veitt okkur þær upplýsingar um af hverju kylfan er að gera það sem hún er að gera og sýnt hvernig við getum sveiflað á heilbrigðari hátt. Græjan segir manni hvort maður er að gera eitthvað rétt eða ekki,“ segir Andri. En gerir þetta starf golfkennara ekki hálf úrelt?

„Nei, þetta gerir okkur bara betri.“

Hvergi til annars staðar

Mikil þróun hefur verið á greiningarvinnu tengdri golfi á undanförnum árum en ekki er til neitt í líkingu við ELVU, sem verkar bæði án allra skynjara og veitir svo hraða endurgjöf. Menn vonast til að um sé að ræða umbyltingu í golfþjálfun.

„Þetta er eina græjan þar sem þú getur labbað á mottuna, slegið, og svo bara bíðuru í nokkrar sekúndur og færð niðurstöðu. Þetta er hvergi til annars staðar,“ segir Arnar Már Ólafsson, meðstofnandi og golfkennari hjá GKG.

Fréttina má sjá í spilaranum að ofan.