Mættur í Sam­fylkinguna

Þórður Snær greinir frá þessu í Kjarnyrt, fréttabréfi sínu, í morgun. Þar segir hann að hann hafi þar með ákveðið að taka þátt í skipulögðu stjórnmálastarfi í fyrsta sinn á ævi sinni.

„Ég tel, eftir töluverða yfirlegu og fjölmörg samtöl, að þar sé að finna þá pólitík sem mér hugnast best og fer saman við þær áherslur sem ég vil sjá að séu ráðandi í samfélaginu. Nú er tíminn til að knýja fram réttlátar breytingar á Íslandi og Samfylkingin, sem hefur opnast og breikkað með innkomu og undir forystu Kristrúnar Frostadóttur, er að mínu mati aflið til að leiða þá vegferð. Ég vil taka þátt í því stóra verkefni af fullum krafti og leggja mitt lóð á vogaskálarnar fyrir betra samfélagi.

Mér finnst réttast að greina strax frá þessu hér þannig að ekkert sé óljóst varðandi mína stöðu þegar greiningar og pistlar eru lesnir, sérstaklega þar sem kosningar virðast ætla að verða næsta vor,“ segir Þórður Snær.

Tekið að sér verkefni fyrir flokkinn og hættir á Rás 1

Í færslu á Facebook-síðu sinni segir Þórður Snær að hann hafi þegar tekið að sér ákveðin verkefni tengd stefnumótun fyrir flokkinn frá og með komandi mánaðamótum.

„Samhliða hef ég tilkynnt stjórnendum Morgunvaktarinnar á Rás 1 að ég sé hættur að greina efnahagsmál og samfélag á þeim vettvangi, en það hef ég gert óslitið síðan í byrjun árs 2019. Greiningin á þriðjudag var því sú síðasta. Það passar ekki saman, að mínu viti, að taka þátt í skipulögðu flokksstarfi og sinna því hlutverki. Frábærum stjórnendum og öllum sem hafa hlustað þakka ég samfylgdina í næstum sex ár,“ segir Þórður Snær. 

Þórður Snær ritstýrði Kjarnanum frá stofnun miðilsins árið 2013 þar til hann sameinaðist Stundinni og úr varð Heimildin í lok árs 2022. Þórður var annar ritstjóra Heimildarinnar þangað til í sumar.

Daginn eftir að tilkynnt væri að rannsókn væri hætt

Þórður Snær greinir frá ákvörðun sinni daginn eftir að lögreglustjórinn á Norðurlandi eystra tilkynnti að ákvörðun hafði verið tekin um að hætta rannsókn í máli sem varðaði meinta byrlun Páls Steingrímssonar, skipstjóra Samherja, afritun á upplýsingum af síma einstaklings og dreifingu á kynferðislegu myndefni. 

Sex blaðamenn, þar á meðal Þórður Snær, höfðu þar réttarstöðu sakbornings í málinu í á þriðja ár, ásamt fyrrverandi eiginkonu Páls. Rannsókn málsins stóð í á fjórða ár.

Þórður Snær var meðal þeirra sem tjáði sig um niðurstöðu lögreglunnar á samfélagsmiðlum í gær og ræddi hann sérstaklega vinnubrögð og seinagang lögreglu í málinu. „Mér var haldið í stöðu sakbornings í 961 dag í rannsókn sem staðið hefur í nálægt þrjú og hálft ár. Á þeim tíma var ein skýrsla tekin af mér, í ágúst 2022, fyrir rúmlega 25 mánuðum síðan. Á meðan fékk handfylli manna, með hjálp ýmissa skráðra fjölmiðla, að spinna ótrúlegar lygasögur utan á þetta mál. Setja fram súrrealískar staðhæfingar sem áttu sér enga stoð í raunveruleikanum,“ sagði Þórður Snær.

Hann sagði ennfremur að hann og kollegarnir hefðu fengið þessa réttarstöðu vegna þess að hluti þeirra hafi skrifað fréttir um það hvernig hópur fólks, með vitund og vilja stjórnenda eins stærsta fyrirtækis landsins, hafi unnið skipulega að því að reyna að hafa æruna, heilsuna og lífsviðurværið af blaðamönnum sem hafi fjallað um fyrirtækið.