250 sýningar af Elly: „Án hennar væri Ís­lands­sagan öðru­vísi“

„Saga Ellyjar var næstum glötuð um alla eilífð. Það að hafa gefið henni líf á sviðinu 250 sinnum sýnir okkur hversu mikilvæg hún er okkur öllum. Án hennar væri Íslandssagan öðruvísi,“ segir Gísli Örn Garðarsson leikstjóri og annar af höfundum söngleiksins.

Söngleikurinn, sem fjallar um ævi og ástir einnar vinsælustu söngkonu Íslandssögunnar, var frumsýndur 18. mars 2017 og gekk fyrir fullu húsi í rúm tvö ár þar til sýningum var hætt. Vegna fjölda áskorana sneri Elly aftur í takmarkaðan tíma í haust og hefur gengið fyrir fullu húsi síðan. Nú hafa um 119 þúsund áhorfendur séð þessa rómuðu sýningu og er hún því mest sótta sýning landsins á eftir Níu lífum. 

Alltaf jafn yndislegt að leika hana

Björgvin Franz Gíslason leikur Ragga Bjarna og Vilhjálm Vilhjálmsson í sýningunni og segir einstaklega gaman að fá annað tækifæri til að leika í þessari dásamlegu sýningu „mér leið eins og við hefðum gert hana í fyrra en ekki fyrir fimm árum síðan. Ég held að sýningin hafi dýpkað og þroskast og svo erum við líka búin að bæta nokkrum lögum inn í sýninguna til að poppa þetta aðeins upp fyrir jólin“.

Katrín Halldóra, sem leikur sjálfa Elly, segir að það sé alltaf jafn yndislegt að leika þessa mögnuðu konu. „Það er búið að vera engu líkt að túlka Elly á ný og fá áhorfendur með okkur í ferðalagið um sögu hennar. Sýningin hefur breyst, hún er orðin þroskaðri og ég finn svo sterkt hvað hún á enn mikið erindi, þvert á kynslóðir sem koma og heillast af sögu Ellyjar.

Það voru miklar tilfinningar hjá leikhópnum og hljómsveitinni að lokinni 250. sýningunni eins og sjá má í myndbandi frá Borgarleikhúsinu sem tekið var upp af þessu tilefni. Söngleikurinn Elly er sýndur á Stóra sviði Borgarleikhússins en áætlað er að sýningum ljúki snemma á nýju ári. Nú í desember verður sérstök jólastemning en ný syrpa jólalaga er tímabundið komin inn í sýninguna.