Bú­seti segir marg­vís­lega galla á deiliskipulaginu

Þetta kemur fram í bréfi Búseta til borgarinnar sem unnið var af lögfræðiþjónustunni Logos. Þar er framvinda málsins rakin og nýjustu vendingar. Nánar tiltekið sú umræða sem skapast hefur í fjölmiðlum þar sem borgarfulltrúar lýsa vilja til þess að kanna hvort hægt sé að lækka húsið. 

Búseti vísar til svars byggingarfulltrúa borgarinnar sem afgreiðir áhyggjur félagsins og kröfu um að framkvæmdir verði stöðvaðar á einfaldan hátt. Uppbyggingin sé einfaldlega í samræmi við skipulag. Við þetta gerir Búseti ýmiss konar athugasemdir og óskar eftir nánari upplýsingum um farveg málsins innan Reykjavíkurborgar. 

„Í fyrsta lagi rétt að halda til haga að gerðar hafa verið athugasemdir við skipulagsbreytingarnar, m.a. af hálfu íbúa á svæðinu, allt frá árinu 2022, eins og m.a. var rakið í fyrrnefndu bréfi Búseta til borgarinnar 12. nóvember sl. Var þar einkum um að ræða athugasemdir um umfang byggingarinnar, takmörkun á útsýni og áhrif á birtu í nærliggjandi íbúðarhúsnæði. Ekki þótti tilefni til að staldra við og skoða þau mál áður en framkvæmdir hófust sem endurspegla sömu atriði og eru til umfjöllunar nú. Reykjavíkurborg hafði því bæði fullt tilefni og fullnægjandi vitneskju til að bregðast við fyrr í ferlinu,“ segir í bréfinu. 

Skipulagsfulltrúi hafi gert ráð fyrir að ekki væri hægt að byggja fimm hæða byggingu, „byggingarmagn væri ekki nægjanlegt fyrir slíku.“ Þannig væru áhyggjur íbúa óþarfar.

„Þá tók hann (skipulagsfulltrúi) fram að „nýtingarhlutfall [væri] um 1,0 en heimilaður byggingareitur [væri] um 10.500 fm, þannig að ef byggingarmagnið yrði jafndreift á lóð innan byggingareits þá myndi byggingarmagnið ná upp í 1,5h fyrir heimilt byggingarmagn“. Skipulagsfulltrúi gerði því ráð fyrir einni og hálfri hæð að hámarki ef byggingarreiturinn yrði fullnýttur,“ 

Í öðru lagi hafi breytingar á skipulagi ekki uppfyllt skilyrði skipulagsreglugerðar um skýra og greinargóða skilmála. Skipulagið fyrir Suður-Mjódd sé umfangsmikið og flókið skipulagssvæði þar sem taka þurfi tillit til ýmissa hagsmuna.

„Breytingar voru gerðar á umræddum lóðum að Álfabakka í áföngum og ljóst að heildstæð mynd lá ekki fyrir um fyrirhugaðar framkvæmdir á lóðinni með síðustu breytingum árið 2022 og þá með þeim hætti að almenningur gæti áttað sig á áhrifum þeirra breytinga á nærumhverfi sitt.“

Um hafi verið að ræða verulega breytingu á deiliskipulagi með tilheyrandi kröfum til skipulagsgagna.

Sú staða að byggingarleyfi var síðan samþykkt af hálfu byggingarfulltrúa í Reykjavík þann 17. október 2023 dregur enn frekar fram hversu óljóst var um hvers konar framkvæmdir var að ræða. Sótt var um leyfi „til að byggja stálgrindarhús, tveggja hæða að hluta, klætt steinullarsamlokueiningum og málmklæddu yfirborði á lóð nr. 2 við Álfabakka“, sbr. byggingarleyfisumsókn nr. USK23080010, sem var samþykkt.

Með tilliti til breytinga á skipulagi geti mannvirkið ekki talist „tveggja hæða að hluta“.

„Þegar litið er til breytinga á deiliskipulagi á svæðinu og orðalags byggingarleyfis getur það mannvirki sem nú hefur risið ekki talist „tveggja hæða að hluta“. Þá er það mikil einföldun að vísa til þess að í byggingarreglugerð komi fram að salarhúsnæði í atvinnuhúsnæði skuli vera a.m.k. 2,50 m að innanmáli frá fullfrágengnu gólfi að fullfrágengnu lofti nema fyrirhuguð starfsemi sé þess eðlis að þörf sé á meiri lofthæð. 

Rök Reykjavíkurborgar standast ekki nánari skoðun enda mætti þá að sama skapi halda því fram að skipulagsskilmálar og byggingarleyfi heimiluðu byggingu atvinnuhúsnæðis svo lengi sem lofthæð væri a.m.k. 2,5 m.“

Þá hafi aðstöðumyndir ekki uppfyllt kröfur byggingarreglugerðar, þá hafi „verulegir annmarkar“ verið á auglýsingu vegna lokabreytinga á skipulaginu á sínum tíma árið 2022. 

Fleira er talið til og ítrekuð sú krafa sem gerð var með bréfi 12. nóvember um að byggingarfulltrúi stöðvi framkvæmdir á grundvelli ákvæðis laga um mannvirki, sem kveður á um að stöðva skuli framkvæmdir ef ekki er fylgt lögum og reglum srm gildi um framkvæmdina.