Kylfurnar eftir í Amsterdam en Gunn­laugur nýtur sín meðal þeirra bestu

Á mótinu mæta tólf fremstu áhugakylfingar Evrópu þeim tólf bestu frá Asíu og Eyjaálfu. Fyrsti dagur af þremur var í dag og náðu þeir Gunnlaugur Árni og Svíinn Algot Kleen að tryggja Evrópu sigur í einum leik í fjórbolta. Þeir töpuðu hins vegar í fjórmenningnum, en viðureignirnar voru við Pichaksin Maichon frá Taílandi og Zhou Ziqin frá Kína og þess má geta að Maichon er í 22. sæti heimslistans. 

Staðan í heildarstigakeppninni er jöfn, 5-5.

Árangur Gunnlaugs Árna í dag, eftir óhemju skjótan uppgang á nýliðnu ári, er ekki síður athyglisverður vegna þess að hann var ekki með golfsettið sitt í undirbúningnum síðustu daga. Settið varð eftir á flugvellinum í Amsterdam og skilaði sér ekki fyrr en eftir æfingahring í gær.

„Það hefur verið „öðruvísi“ að undirbúa sig án þess að hafa settið sitt. Ég ætlaði að vera sniðugur og mæta hingað degi fyrr en settið kom ekki svo þau plön fóru út um gluggann. En ég nýtti vikuna með lánssett, sem gerði lítið, og notaði líka kylfurnar frá liðsfélögunum sem voru mjög góðir með það. Svo voru fulltrúar Titleist hérna sem gerðu fyrir mig nýtt 3-tré og dræver, svo ég gat alla vega séð völlinn frá teignum,“ sagði Gunnlaugur Árni í gær, í viðtali við Golfsamband Evrópu, EGA.

Viðtalið, sem tekið var upp í gær áður en mótið hófst, má sjá hér að neðan.

Gunnlaugur Árni er fyrsti Íslendingurinn til að spila fyrir Evrópu í Bonallack-bikarnum:

„Það er mikill heiður að vera valinn til að spila fyrir land og heimsálfu, og ég er mjög þakklátur fyrir það. Það er líka bara frábært að spila með þessum frábæru kylfingum sem eru liðsfélagar mínir þessa vikuna. Ég er mjög spenntur fyrir komandi leikjum,“ sagði Gunnlaugur Árni í gær.

Eins og fyrr segir spilaði Gunnlaugur Árni með Svíanum Algot Kleen í dag en þeir eru félagar úr Louisana State háskólanum í Bandaríkjunum, þar sem Gunnlaugur Árni hóf nám í ágúst:

„Við höfum þekkst ágætlega lengi og mér finnst okkar leikstíll mjög svipaður og passa vel saman. Hann hefur verið sá helsti sem ég hef getað leitað til úti og hjálpað mér gríðarlega mikið að koma mér fyrir og líða vel í skólanum. Hann er alveg frábær,“ sagði Gunnlaugur Árni sem er staðráðinn í að halda áfram á sömu braut eftir að hafa orðið fremsti karlkylfingur Íslands á síðasta ári:

„Ég myndi segja að aðalatriðið sé að halda þeirri vegferð áfram sem ég hef verið í með mínu teymi. Ég er mjög heppinn með fólkið í kringum mig og treysti þeim fyrir því sem þau gera best. Svo hefur það verið mikill lærdómur að fara til Bandaríkjanna í háskóla og vera innan um bestu leikmenn alla daga. Það hefur skilað góðum árangri.“