Ætla að halda Lífskviðuna þrátt fyrir and­lát Ás­geirs í nótt

Undanfarið hafði Ásgeir verið að skipuleggja viðburðinn Lífskviða sem var á dagskrá í sumarbústað skammt frá Kjarnaskógi í dag. Aðstandendur hans ætla að halda viðburðinn á tilsettum tíma, þrátt fyrir andlátið, og heiðra minningu Ásgeirs.

Valur Gunnarsson, sagnfræðingur og vinur Ásgeirs, segir í samtali við fréttastofu að þessi viðburður hafi haldið Ásgeiri gangandi síðustu dagana, að koma fólki saman. Það muni takast í kvöld og andi Ásgeirs muni svífa yfir vötnum.

„Eftir að hafa ráðfært okkur við nánustu fjölskyldu og vini þá finnst okkur rétt og í anda Ásgeirs að halda viðburðinn. Honum var mjög tíðrætt um þetta og það minnsta sem við getum gert er að minnast hans,“ segir Valur.

Að sögn Vals munu ýmsir listamenn koma fram og til dæmis lesa ljóð eftir Ásgeir og ljóð honum til heiðurs.

„Labbaði út með dauðadóm á bakinu síðasta þriðjudag. Er búinn að fá niðurstöður varðandi krabbann. Örið á vélindanu hefur búið til svo mikið mein á lifrinni að þeir segja þetta ekki meðferðartækt. Vikur, mögulega mánuðir eftir,“ skrifaði Ásgeir í viðburðarlýsingu Lífskviðunnar á Facebook.

„Í þessari tímalínu. En þetta gerist allt of snemma í sögunni og ég veit að það er leið út úr þessu rugli. En þar til kraftaverkið gerist erum við nú á Akureyri að skipuleggja nokkurskonar lífskviðu, kviðu lífsins, með ljóðaupplestrum, tónlist, tölum, myndlist og fleiru. Það væri gaman að sjá ykkur frábæra fólk laugardaginn 25. janúar á Götu sólarinnar 6. Þetta er langleiðina út í Kjarnaskóg en nóg af fólki á bílum, reddast allt.“

Í viðburðarlýsingunni sagði líka að það væri opið hús milli tvö og fimm í dag, en þá væri „spjall og chill“ og síðan myndi formleg dagskrá hefjast klukkan sjö í kvöld.