Myndi setja ríkis­stjórnina í „al­gjöra úlfa­kreppu“

Í ljós hefur komið að fimm stjórnmálaflokkar hafa á undanförnum árum fengið greiðslur sem þeir áttu ekki að fá samkvæmt lögum. Flokkur fólksins er þó sá eini sem hefur ekki enn breytt skráningu í samræmi við lög.

Eiríkur Bergmann, prófessor í stjórnmálafræði, segir málið geta haft mikil pólitísk áhrif. Sérstaklega ef Flokki fólksins verði gert að endurgreiða peningana.

„Það er nú illhugsanlegt að sjá það fyrir sér að ríkisstjórnarflokkur færi á einhverskonar kennitöluflakk og stofnaði nýjan flokk á grundvelli gjaldþrota hreyfingar,“ sagði Eiríkur í fréttum Stöðvar 2.

„Það yrði allavega pólitískt mjög erfitt og erfitt fyrir samstarfsflokkana líka að verja slíkt. Manni virðist á mörgu sem fram hefur komið að þarna hafi sannarlega verið ofgreitt fé og hingað til hefur það verið þannig að ofgreiði ríkið fé, þá beri fólki að endurgreiða það.“

„Allir bótaþegar í landinu hafa fengið að upplifa eitthvað slíkt, eða margir þeirra.“

Hér að neðan má sjá frétt Stöðvar 2 um málið og viðtal við Ingu Sæland, þar sem hún segir að Flokkur fólksins færi í þrot ef þeim verður gert að greiða peningana til baka. Þar á eftir má sjá ummæli Eiríks.

Algjör úlfakreppa

Eiríkur segir að verði niðurstaðan sú að flokknum beri að endurgreiða þetta og þau neita því, sé í sjálfu sér ekkert sem neinn getur gert. Hins vegar geti mögulega verið hægt að semja um að greiðslur til einhverra ára en til þess þurfi samningsvilja hjá leiðtogum Flokks fólksins.

„Pólitískt myndi þetta setja ríkisstjórnina í algjöra úlfakreppu. Það á fyrstu metrum í starfi hennar,“ sagði Eiríkur.

Hann sagði mál sem þetta geta undið upp á sig og orðið illviðráðanleg í stjórnmálalegu tilliti.

Eiríkur telur að það hjálpi Flokki fólksins mjög að fleiri flokkar hafi ranglega fengið greiðslur á undanförnum árum.

„Það er auðvitað samt smá munur á því hvort þetta sé bara eitthvað tímabundið mál, sem var þarna fyrsta árið eftir að þessi nýju lög taka gildi eða hvort að staðan sé viðvarandi. Mér finnst það breyta ansi miklu varðandi pólitíska stöðu en varðandi endurgreiðslurnar yrðu allir jafnt krafðir um þær, hvort sem það væri til skemmri eða lengri tíma.“

Óþægilegt mál á fyrstu metrunum

Eiríkur sagði tilfinningu hans á þá leið að ansi mörg vandræðamál hafi skotið upp kollinum hjá Flokki fólksins á þessum fyrstu dögum ríkisstjórnarinnar.

„Fréttaflutningur hefur verið ansi mikill í kringum vandræðagang hjá honum [Flokki fólksins]. Eðli samsteypustjórna er þannig að þegar einn stjórnarflokkurinn lendir í vandræðum, þá færist það auðvitað yfir á alla ríkisstjórnina. Forystumenn samstarfsflokkanna, og alveg sér í lagi forsætisráðherra getur ekki vikið sér undan því að taka á slíku máli og ræða það almennilega og hreint út við þjóðina.“

„Það þýðir ekkert að fara undan í flæmingi í þeim efnum.“

Eiríkur sagði stjórnmálaöfl hafa komist í kringum allskonar hindranir í gegnum árin en þetta mál snerist í raun um viðmót og hvernig svona máli væri mætt.

„Ef að fólk ætlar að læsast í einhverri afneitun þá er það erfitt. En um leið og stjórnmálaflokkar sýna skilning og samstarfsvilja og biðjast jafnvel afsökunar á einhverjum yfirsjónum, er vel hægt að vinna sig út úr slíkum málum. Það eru viðbrögðin sem ráða þessu en ekki bara eðli máls,“ sagði Eiríkur.