Hlógu að Tiger: Eitt það vandræðalegasta á ferlinum

Óskar Ófeigur Jónsson skrifar 19. febrúar 2025 07:30

Tiger Woods átti ekki gott kvöld í TGL deildinni sinni og sló eitt afar slæmt högg. Getty/Ben Jared

Hlutirnir gengu ekki alveg nógu vel hjá Tiger Woods í nýju golfhermisdeildinni hans í nótt. Liðsfélagar hans í Jupiter Links gátu ekki bjargað honum því þeir áttuðu sig of seint að eitthvað var að.

TGL deildin er spiluð í glæsilegum golfhermi innanhúss og er á sínu fyrsta tímabili. Tiger Woods og Rory McIlroy standa sjálfir á bak við þessa nýstárlegu golfdeild sem er nýstárleg blanda af golfhermi og venjulegu golfi.

Þetta er liðakeppni og í nótt áttu Tiger og félagar í Jupiter Links leik á móti New York.

Tiger átti að slá og það voru 199 jardar í holuna. Woods bað um staðfestingu á fjarlægðinni en heyrði ekki 199 jarda heldur 99 jarda.

Woods tók því upp sandfleyg og sló hundrað jarda högg. Það var auðvitað alltof stutt.

„Ég heyrði 99 jarda, fór út og sló þannig,“ sagði Tiger Woods í viðtali á ESPN sem sýndi frá keppninni. Hann var á þrettándu holu í einvígi sínu við Cameron Young í liði New York sem hann tapaði.

„Þetta er eitt það vandræðalegasta á golfferlinum,“ sagði Woods hlæjandi

„Ég bara klúðraði þessu, þetta var svo vandræðalegt,“ sagði Woods.

Liðsfélagar hans, Kevin Kisner og Tom Kim, veltust líka um úr hlátri.

Þegar kemur að leiknum sjálfum þá vann New York öruggan 10-3 sigur.