Úr einu ráðu­neyti í annað: Upp­lýsinga­full­trúi verður verk­efna­stjóri áhersluverkefna

Þetta er meðal þess sem kemur fram í svari frá forsætisráðuneytinu við fyrirspurn Vísis um breytta skipan ráðuneyta. Upphaflega stóð til að breytingarnar, sem hafa í för með sér að menningar- og viðskiptaráðuneytið verði lagt niður, tækju gildi 1. mars.

Vegna kærumála sem tengdust alþingiskosningunum í nóvember kom þing hins vegar saman síðar en áætlað var, og því hefur þingsályktunartillaga um breytingarnar ekki enn verið afgreidd í þinginu. Nú er miðað við að breytingarnar taki gildi 15. mars, samkvæmt svari frá Sighvati Arnmundssyni, upplýsingafulltrúa forsætisráðuneytisins.

Sjö starfsmenn færast í önnur störf

Nú þegar hafa ráðherrar tekið við þeim málaflokkum sem heyra munu undir þá samkvæmt nýrri skipan, en þegar breytingarnar taka formlega gildi verður ekkert til lengur sem heitir menningar- og viðskiptaráðuneytið, sem Lilja Alfreðsdóttir stýrði í síðustu ríkisstjórn. Breytingarnar eru sem hér segir: 

„Viðskipti, neytendamál og ferðamál færast til verðandi atvinnuvegaráðuneytis (nú matvælaráðuneyti). Fjölmiðlar, safnamál, listir, menning, íslenska, höfundaréttur og ábyrgðarreglur og efnisréttindi á netinu flytjast til verðandi menningar-, nýsköpunar- og háskólaráðuneytis (nú háskóla-, iðnaðar- og nýsköpunarráðuneyti).“

Breytingarnar hafa einnig í för með sér fækkun stöðugilda, eins og það er orðað.

„Alls fækkar stöðugildum um 7,8 við niðurlagningu menningar- og viðskiptaráðuneytis, auk ráðherra og tveggja aðstoðarmanna. Þá fækkar um eitt stöðugildi hjá Umbru vegna ráðherrabílstjóra. Alls er því um að ræða 11,8 stöðugildi,“ segir í svari ráðuneytisins. 

Sjö starfsmenn, í 6,8 stöðugildum, sem sinntu þeim störfum sem lögð verða niður fá hins vegar flutning í laus störf annars staðar í Stjórnarráðinu. Þar er um að ræða störf sem annars hefðu verið auglýst laus til umsóknar. 

Þá flytjast 16 stöðugildi úr viðskipta- og menningarráðuneytinu sáluga til atvinnuvegaráðuneytis Hönnu Katrínar Friðriksson, en  11,2 stöðugildi flytjast til menningar-, nýsköpunar og háskólaráðuneytis Loga Einarssonar.

Tobba verður verkefnastjóri áhersluverkefna hjá Loga

Þorbjörg Marínósdóttir, oftast þekkt sem Tobba Marínós, er á meðal þeirra sem starfað hafa í menningar- og viðskiptaráðuneytinu sem brátt heyrir sögunni til. Þar innanhúss var hún upplýsingafulltrúi, en fréttastofa hafði fengið veður af því að hún væri meðal þeirra sem færast til í starfi, og spurði því sérstaklega út í þann þátt málsins.

„Þorbjörg mun taka við stöðu verkefnastjóra áhersluverkefna í menningar-, nýsköpunar- og háskólaráðuneyti.“

Samkvæmt svari ráðuneytisins felst í þeim starfstitli að „leiða sérstök verkefni sem skera sig frá hefðbundnum verkefnum, m.a. vegna umfangs eða áskorana á sviði samskipta og samninga, gagnaöflunar og úrvinnslu.“

„Þá flokkast verkefni sem fela í sér tækifæri og hafa ríkan ávinning í för með sér fyrir málaflokka ráðuneytisins einnig sem áhersluverkefni.“

Leigja húsnæðið til 2027

Menningar- og viðskiptaráðuneytið var til húsa í Hafnarstræti 5, í húsnæði sem ríkið leigði tímabundið undir starfsemi þess. Leigusamningurinn rennur út 1. júní 2027, en húsnæðið er 786 fermetrar og leiguverðið um 3,2 milljónir á mánuði miðað við uppreiknaða leigu í febrúar 2025. 

„Aðstaðan verður nýtt undir aðra starfsemi og vinna stendur yfir við að útfæra það,“ segir í svarinu.

Loks var leitað svara við því hvað ofangreindar breytingar kæmu til með að hafa mikinn sparnað í för með sér, á ári hverju.

„Áætluð hagræðing á ársgrundvelli er rúmlega 362 milljónir [króna],“ segir í svarinu.