Players endar í ein­vígi: „Halda allir að hann vinni“

Norður-Írinn Rory McIlroy virtist ætla að tryggja sér sigur á mótinu þegar hann náði þriggja högga forskoti í gær, á lokahringnum.

Því náði hann á 12. holu, eftir fjögurra klukkutíma hlé vegna þrumuveðurs.

Hinn bandaríski JJ Spaun, sem var efstur fyrir lokahringinn en byrjaði hann illa, komst í mikinn ham eftir þrumuveðrið og vann upp forskot McIlroy. Þeir voru orðnir jafnir eftir 16 holur og pöruðu báðir síðustu tvær holurnar. Þeir enduðu á -12 höggum, tveimur höggum á undan Tom Hoge, Akshay Bhatia og Lucas Glover.

McIlroy er í 2. sæti heimslistans, hefur þegar unnið 27 mót á PGA-mótaröðinni og er mögulega besti kylfingur sinnar kynslóðar. Spaun er aftur á móti mun minna þekktur, í 57. sæti heimslistans, með aðeins einn sigur á PGA-móti í 227 tilraunum og íhugaði að hætta á síðasta ári.

Það er því ljóst hvor þykir sigurstranglegri í dag, þegar framlengingin hefst klukkan 13 að íslenskum tíma.

„Það halda allir að hann vinni. Ég held að það búist fáir við því að ég hafi betur. En ég býst sjálfur við því að ég vinni. Það er það eina sem skiptir mig máli,“ sagði Spaun.

Að sama skapi er öll pressan á McIlroy í framlengingunni sem gengur þannig fyrir sig að kylfingarnir spila þrjár síðustu brautirnar á TPC Sawgrass vellinum.

Verði þeir enn jafnir eftir það þá tekur við bráðabani sem hefst á 17. braut sem er ein sú frægasta í golfheiminum. Þaðan er haldið á 18. braut ef þess þarf og svo á 16. braut ef þess þarf. Þetta er svo endurtekið eins og þarf þar til að sigurvegari er fundinn.