Ár frá þjófnaðinum í Hamra­borg og enginn verið á­kærður

Samkvæmt upplýsingum frá ákærusviði lögreglunnar á höfuðborgarsvæðinu hefur ákæra ekki verið gefin út í málinu.

Þjófnaðurinn átti sér stað þann 25. mars 2024 þegar að tveir menn brutust inn í bifreið og höfðu með sér þýfið. Sérsveit var kölluð til eftir að tilkynnt var um innbrotið og var lýst eftir dökkgráum Toyota Yaris sem reyndist síðar vera með tvær mismunandi númeraplötur sem voru báðar stolnar af öðrum ökutækjum.

Starfsmenn öryggismiðstöðvarinnar voru inn á Catalinu í Kópavogi að sækja pening úr spilakössunum á meðan þjófarnir aðhöfðust en sjá má myndskeið af atvikinu í spilaranum hér að neðan. Þýfið voru peningar sem komu úr spilakössum á vegum Happdrættis háskólans. Á rúmum þrjátíu sekúndum brutust þjófarnir inn í bílinn, tóku töskur og brunuðu í burtu.

Sjö töskum var stolið en einungis voru verðmæti í tveimur þeirra.

Daginn eftir fundust töskur í Mosfellsbæ á þremur mismunandi stöðum, við Lágafellskirkju í Mosfellsbæ, við Bugðufljót og úti í móa uppi við Esjumela. Verðmætin höfðu þó verið tekin úr töskunum.

Fyrir liggur að í einhverjum taskanna voru litasprengjur sem sprungu við það að þær voru opnaðar. Þó er óljóst hversu mikið af verðmætunum eyðilögðust.

Upprunalega var talið að allar töskurnar væru fundnar en síðar kom í ljós ein af töskunum væri ófundin, sú var full af peningum.

Í byrjun maímánaðar á síðasta ári var íslenskur karlmaður um fertugt úrskurðaður í gæsluvarðhald í tengslum við þjófnaðinn í Hamraborg, fimm vikum eftir atvikið.

Samkvæmt heimildum fréttastofu rötuðu litaðir peningaseðlar í spilakassa á vegum Happdrættis Háskóla Íslands nokkrum dögum áður. Lögreglan hélt spilunum þétt að sér.

Í nóvember var greint frá því að málið væri komið til ákærusviðs lögreglunnar, og að einn væri með stöðu sakbornings. Líkt og áður segir á enn eftir að gefa út ákæru í málinu.