Telja hryllings­búgarðinn hafa verið þjálfunar­búðir en ekki útrýmingar­búðir

Sjálfboðaliðasamtök sem leita að fólki sem er saknað römbuðu á yfirgefinn búgarðinn í Jalisco-ríki fyrr í þessum mánuði. Þar fundu þeir meðal annars líkbrennsluofna, brenndar líkamsleifar, beinflísar og fjölda persónulegra muna sem lögreglu yfirsást þegar hún leitaði á búgarðinum í haust.

Búgarðinum var í kjölfarið lýst sem „útrýmingarbúðum“ og talið líklegt að eitthvert þeirra harðsvíruðu glæpasamtaka sem halda Mexíkó í heljargreipum hefði átt hann. 

Nú segir Omar García Harfuch, öryggismálaráðherra Mexíkó, að ekkert bendir til þess að kerfisbundin dráp á fjölda fólks hafi farið fram á búgarðinum jafnvel þótt að fólk hafi verið myrt og pyntað þar.

„Á þessari stundu endurtek ég að við höfum engar vísbendingar um að þetta hafi verið útrýmingarbúðir heldur frekar þjálfunarbúðir,“ hefur Reuters-fréttastofan eftir ráðherranum.

Alríkislögreglan tók yfir rannsókn á búgarðinum eftir að saksóknari sagði að ríkisyfirvöld í Jalisco hefðu klúðrað henni. Eftir að ríkislögreglumenn skoðuðu búgarðinn í september var hann skilinn eftir án eftirlits þar til sjálfboðaliðahópurinn fann hann eftir að honum barst nafnlaus ábending um hann.

Einn maður hefur verið handtekinn í tengslum við rannsóknina. Hann er sakaður um að hafa stýrt liðssöfnun fyrir glæpasamtökin Ný kynslóð glæpahrings Jalisco (CJNG). Menn hafi verið tældir á búgarðinn með fölskum loforðum um atvinnutækifæri. Þeir sem hafi neitað að hljóta þjálfun og ganga í samtökin eða reynt að flýja hafi verið myrtir eða pyntaðir.

Varlega áætlað er vel á annað hundrað þúsund manna saknað eftir að hafa horfið sporlaust í Mexíkó. Fáir finnast nokkru sinni, lífs eða liðnir.