Enn stærri jarð­skjálfti á svipuðum slóðum

Þetta er aðra nóttina í röð sem jarðskjálfti er á þessum slóðum, en í gærnótt var skjálfti sem mældist 4,7 að stærð.

„Talsverð eftirskjálftavirkni fylgir og má búast við að eftirskjálftar geti orðið allt að 3,8 að stærð,“ segir í tilkynningu Veðurstofunni.

Fram kemur að henni hafi borist fjölmargar tilkynningar um að skjálftinn hafi fundist í byggð, meðal annars frá Akureyri, Húsavík og Dalvík.

Ingibjörg Andrea Bergþórsdóttir, náttúruvársérfræðingur hjá Veðurstofunni, segir í samtali við fréttastofu að ekki sé hægt að lesa mikið í það að þarna hafi orðið stórir jarðskjálftar tvo daga í röð, nema að þetta sé lifandi jarðskjálftasvæði.

„Þetta er áminning til fólks að þarna geta orðið stórir skjálftar.“

Er hægt að búast við stærri skjálftum en þetta?

„Það er ekki hægt að segja til um það, en þetta er fínt tækifæri til að vekja fólk til umhugsunar um að þarna geta orðið skjálftar um sex að stærð.“