Óðs manns æði Arnars: „Ég ætla samt að gera þetta“

Arnar stýrði sínum fyrstu leikjum með landsliðinu í mars síðastliðnum þegar liðið tapaði fyrir Kósóvó í tveggja leikja umspili og féll þar af leiðandi í C-deild Þjóðadeildar. Umræðan í kringum liðið var eftir úrslitunum og töluvert gagnrýnd. Arnar viðurkennir að sú umræða hafi tekið á hann.

„Hún gerði það, maður er mannlegur og mikill keppnismaður. Maður er ekki að þessu til gamans og auðvitað skipta úrslitin máli. En í þessum glugga skipti líka miklu máli að leikmenn fengu að kynnast mér og ég þeim. Og að byrja einhversstaðar á þessari vegferð,“ segir Arnar sem er umhugað um framfaraskref og kollvörpun á leikstíl liðsins.

„Fyrir mér var glugginn mjög góður hvað það varðar. Svo höldum við áfram í næsta glugga og reynum að vera tilbúnir í haust.“

Sumir lost, en það er allt í lagi

Arnar segir verkefnið sé ekki einfalt. Að umbylta leikstíl liðs og endurstilla DNA íslenska landsliðsins sem hefur náð árangri með ákveðnum áherslum. Áherslum sem nú sé í raun kastað út á hafsauga. Hann er meðvitaður um brjálæðið sem slíkt er í umhverfi sem gefur skamman tíma til undirbúnings og vinnu.

„Það er óðs manns æði í landsliðsumhverfi að reyna að breyta leikstíl landsliðsins svona mikið á stuttum tíma, með fáar æfingar og fáa fundi. Ég ætla samt að gera þetta, það er ekkert flóknara en það,“

„Við ætlum að gera þetta og strákarnir eru mjög opnir og jákvæðir. Sumir hafa náð þessu mjög fljótt og aðrir eru lost. Það er bara allt í lagi. Það er bara einn gluggi búinn og næsti tekur við,“

„Svona hefst vegferðin. Það er ekkert flóknara en það,“ segir Arnar.

Hvað ertu eiginlega að gera?

Arnar hefur þá þurft að venjast nýju starfsumhverfi. Hann kveðst hafa tekið út þroska við nýjar aðstæður og bæti sig sem þjálfari á hverjum degi, þrátt fyrir að hann eyði ekki miklum tíma úti á æfingavelli.

„Það spyrja mig allir að þessari spurningu: „Hvað ertu eiginlega að gera á milli glugga?“ Staðreyndin er sú að það er liggur við meira að gera en í félagsliðaboltanum. Það eru margir leikmenn sem þarf að fylgjast með og ég nýti tækifærið að endurmennta mig, ef svo má að orði komast, að horfa mikið á elítufótbolta í hinum stóra heimi. Ég tel mig vera orðinn miklu sterkari þjálfara en fyrir nokkrum mánuðum síðan. Ég nýt mín vel í þessu starfi,“

„Við höfum stuttan tíma en á móti kemur að við erum með elítuhóp af góðum leikmönnum. Þeir leikmenn sem voru aðeins seinni til að ná þessu í síðasta glugga fá nú tækifæri til að endurmennta sig aftur. Það er áskorun, skemmtileg, og alls ekki verkefni sem ég kvíði fyrir,“ segir Arnar.

Nýjar upplifanir

Daglegar æfingar og fundir sem hann er vanur úr Víkinni eru á bak og burt. Það krefst aðlögunarhæfni að takast á við þennan nýja veruleika.

„Það var rosaleg upplifun, sem ég hafði ekki upplifað áður, eftir síðasta glugga að fá ekki æfingar strax í kjölfarið og fundi. Þeir fara náttúrulega bara í sína vinnu og þú getur ekki verið að bögga þá dagsdaglega með einhverjum taktískum fundum og vídeóklippum. Þeir hafa nóg um sjálfa sig í eigin vinnu. Það hefur verið mikil áskorun,“ segir Arnar.

Töluvert fleira kemur fram í viðtalinu við Arnar sem má sjá í heild sinni í spilaranum að ofan.