Stutt pása hleypti öllu í bál og brand

Tónleikarnir Ferming aldarinnar á vegum FM95BLÖ fóru fram í gær en mikill troðningur myndaðist á seinni hluta þeirra. Tónleikarnir stóðu yfir í átta tíma frá klukkan 17 til 1 en húsið opnaði klukkan 16. Þrír voru fluttir á slysadeild og tveir handteknir fyrir brot á vopnalögum auk þess sem tilkynnt var um líkamsárás.

Á samfélagsmiðlum í gærkvöldi og í nótt lýsti fólk því að takmörkuð gæsla hefði verið á viðburðinum og pissað hefði verið á gólfið vegna bágrar salernisaðstöðu. Þá fóru einhverjir snemma heim vegna troðnings og krefjast endurgreiðslu.

Ásmundur Rúnar Gylfason, aðstoðaryfirlögregluþjónn, segir lögreglu hafa verið með töluverðan viðbúnað á viðburðinum.

„Það kom fjöldi aðstoðarbeiðna frá tónleikagestum í og við Laugardalshöllina. Það komu upp fíkniefnamál, vopnalagabrot, aðilar teknir með hnífa og hnúajárn,“ segir Ásmundur.

„Það þarf að fara yfir eftir helgina með tónleikahöldurum hvernig skipulagið var þarna á tónleikum. Lögreglan mun boða þessa aðila á sinn fund og fara yfir skipulagið, hvernig því var háttað á þessum viðburði.“

Mikill hiti og allir á leið í anddyrið

Jens Andri Fylkisson, eigandi Icelandic Security og yfirmaður öryggisgæslu á viðburðinum, segir öryggisgæslu hafa verið vel mannaða á viðburðinum og fjöldi gesta hafa verið innan leyfilegra ellefu þúsund marka hallarinnar. Mikill troðningur hafi hins vegar myndast um tíuleytið beint eftir að FM95Blö kláruðu sína dagskrá.

„Það myndast þessi mikli troðningur þegar einu atriðinu lauk. Þá var korters pása og tíu þúsund manns reyna að komast út á sama tíma. Svo gengur það ekki og fólk reynir að komast til baka. Þá myndast þrýstingur í báðar áttir og það tók bæði okkur og lögregluna smá tíma að ná hringrásarkerfi á umferðina,“ segir Jens.

Það eru oft fjölmennir viðburðir þarna. Hvað orsakar að þetta gerist á þessum viðburði?

„Þetta er bara af því að það eru allir að gera þetta á sama tíma,“ segir hann. „Hitinn í húsinu var mikill og svo þegar það kemur pása vilja allir komast fram, kaupa sér áfengi og komast í ferskt loft. Það leita allir í sömu átt og það gengur ekki upp, tíu þúsund manns á sama tíma.“

Gekk illa að fá fólk til að hlýða

Jens segir að það hafi ekki verið of margt fólk á viðburðinum né öryggisgæslan illa mönnuð. Laugardalshöllin leyfir ellefu þúsund gesti en að sögn Jens voru á bilinu 9.500 til tíu þúsund manns á svæðinu. Forðast hefði mátt troðninginn með betra skipulagi.

Hefði verið hægt að gera þetta öðruvísi? Hvað vantaði upp á til að forðast þetta?

„Stjórna sviðinu þannig það myndist ekki svona pása. Við breyttum því svo það væri þéttari dagskrá,“ segir Jens. Hefði pásan ekki verið svo löng segist Jens viss um að það hefðu ekki allir farið út á sama tíma.

Hefði ekki verið hægt að beina fólki betur út?

„Þetta er bara það mikið magn. Húsið ræður alveg við þennan fjölda og salurinn en þegar allir ætla út á sama tíma þá ræður anddyrið ekki við það. Svo gekk bara mjög illa að fá fólk til þess að hlýða, fara upp öðrum megin og niður hinum megin,“ segir Jens.

„Við vorum með fullt af starfsfólki í þessari þvögu og það er starfsfólk frá mér sem er með áverka.“

Hvernig var mönnunin? Voruð þið undirmönnuð?

„Nei nei, við vorum alveg vel mönnuð og bættum meira að segja við í lokin. Lögreglan var líka á svæðinu og var inni í þvögunni að hjálpa okkur þar sem mesta kraðakið var,“ segir hann.

Hleypa þyrfti út á fleiri stöðum

Troðningsástandið entist í minna en hálftíma að sögn Jens en fyrir utan það hafi viðburðurinn heilt yfir gengið vel. Hægt sé að fyrirbyggja troðning framvegis með fleiri útgöngum og betra skipulagi á dagskrá.

Hefurðu lent í einhverju sambærilegu áður?

„Kannski ekki af þessari stærðargráðu en þetta gerist alveg á viðburðum að anddyri höndla ekki alla sem eru í salnum. Anddyrin eru aldrei jafnstór og salurinn. Það var alveg rúmt um alla í salnum,“ segir hann. 

Sögur af bágri salernisaðstöðu bárust einnig af viðburðinum en Jens segir óumflýjanlegt að raðir myndist á viðburðum sem þessum.

Hvað er hægt að gera til að fyrirbyggja svona troðning?

„Það þarf að vera útisvæði á öðrum stað þannig það sé hægt að hleypa út úr salnum á tveimur stöðum,“ segir Jens. Þá hefði þurft að stytta það langa stopp sem var á dagskránni.

Fyrir utan þennan troðning um tíuleytið segir Jens að viðburðurinn hafi heilt yfir gengið vel. Lítið hafi verið um alvarleg ofbeldisbrot, innskönnun á viðburðinn hafi gengið vel og fólk almennt hagað sér með friði og spekt.