Segir Bjarna Bene­dikts­syni að stinga tappa upp í „tengda­soninn“

Snærós Sindradóttir, fyrrverandi fjölmiðlakona og dóttir Helgu Völu Helgadóttur, fyrrverandi þingkonu, vekur athygli á ummælum Brynjars Barkarsonar, tónlistarmanns, um móður hennar í færslu á Facebook í gær. Tilefnið virðist vera að Brynjar var á meðal ræðumanna á mótmælafundi gegn „opnum landamærum“ á Austurvelli á laugardag.

Ummæli Brynjars sem Snærós vekur athygli á ganga út á að Helga Vala hafi „stórgrætt á hælisiðnaðinum“ í gegnum lögfræðistofu sína og að féð kæmi úr ríkissjóði. Þessu lýsir Snærós sem einni þrálátustu lyginni sem velli upp úr „rasistum landsins“.

„Við Bjarna Benediktsson vil ég segja: settu tapp í tengasoninn. Hann er að sverta ímynd fjölskyldu þinnar og verða ykkur til stórfelldrar skammar,“ skrifar Snærós en Brynjar er kærasti Helgu Þóru Bjarnadóttur, dóttur fyrrverandi formanns Sjálfstæðisflokksins.

Meira en áratugur síðan hún tók að sér talsmannsverkefni

Snærós rekur hvernig Helga Vala tók að sér lögmannsstörf fyrir hælisleitendur frá Sýrlandi fyrir meira en áratug líkt og tugir annarra lögmanna gerðu samkvæmt því kerfi sem þá var við lýði. Þegar þáverandi ríkisstjórn Sigmundar Davíðs Gunnlaugssonar og Bjarna Benediktssonar færðu alla þjónustu við hælisleitendur til Rauða krossins hafi þessum verkefnum Helgu Völu lokið.

Engu að síður haldi fólk sem „hati útlendinga“ og trúi að bólusetningar séu „massastjórnunartæki stjórnvalda“ áfram að berja á Helgu Völu með ósannindum um að hún hafi beinan fjárhagslegan hag af því að hælisleitendur komi til Íslands.

Gagnrýnir Snærós jafnframt vini Helgu Völu og fyrrverandi bandamenn í pólítik sem viti betur fyrir að hafa aldrei tekið upp hanskann fyrir hana þegar farið sé með þessi ósannindi um hana.

Helga Vala sjálf lýsir þessum störfum sínum á sama hátt í eigin færslu á Facebook. Bætir hún við að eftir að Jón Gunnarsson, þáverandi dómsmálaráðherra, rifti samningi við Rauða krossinn og fól lögmönnum aftur að taka við þjónustu við hælisleitendur hafi hún ekki tekið að sér eitt einasta slíkt verkefni.

„Svona er hluti starfa lögmanns í þágu borgaranna, og ánægjulegt að fá að leiðrétta enn einu sinni síendurtekin ósannindi sem verða ekki sönn þótt tifað sé á þeim í á annan áratug,“ skrifar Helga Vala.

Ekki hægt að skálda þessa vitleysu

Brynjar, sem einhver þekkja sem tónlistarmann úr hljómsveitinni Club Dub, hefur vakið athygli fyrir kynþáttahyggju á samfélagsmiðlum undanfarin misseri. Hann hefur lýst innflytjendum sem eru íslamstrúar sem „blóðsugum“ sem séu komnar til Íslands til þess að „sjúga kerfið þurrt, nauðga og rífa kjaft“ að því er kom fram í frétt DV fyrr í þessum mánuði.

Eiríkur Rögnvaldsson, heiðursprófessor í íslensku, henti gaman að Brynjari í sinni eigin Facebook-færslu í gær án þess þó að nefna hann á nafn.

„Ungur tónlistarmaður í hljómsveitinni ClubDub sem m.a. hefur gefið út lögin „Clubbed up“, „Litli homie“, „Fresh Alla Daga“, „Booty“ og „Bad Bitch í Reykjavík“ lýsir sérstökum áhyggjum af áhrifum útlendinga á íslenska tungu og menningu. Eins og hann myndi örugglega orða þetta: You can‘t make this shit up,“ skrifar Eiríkur en lokaorðin mætti þýða „það er ekki hægt að skálda þessa vitleysu“.

Fréttin hefur verið uppfærð. Upphaflega stóð í henni að Facebook-færsla Brynjars um Helgu Völu væri gömul en það rétt er að hún var sett inn nú um helgina.