Komu í veg fyrir sýruleka á Akur­eyrar­höfn

Slökkvilið Akureyrar var kallað út klukkan 13:36 í gær vegna óhappsins þar sem 40 tonna tankur með forsfórsýru féll nokkra metra niður á þilfar skipsins. Fosfórsýra er mjög ætandi og getur verið stórhættuleg komist hún út undir bert loft.

Slökkviliðið hefur unnið síðustu átján klukkutíma að því að tæma tankinn og koma honum á öruggan stað.

„Við erum enn hérna á vettvangi og erum að undirbúa að hífa þennan laskaða tank sem slitnaði við hífingu í gær og lenti um borð í skipinu aftur. Við erum búin að vinna í nótt við að dæla úr honum í heilan tank og vorum að hífa þann tank á bryggjuna núna,“ sagði Jóhann Þór Jónsson, verkefnastjóri Slökkviliðs Akureyrar, í samtali við fréttastofu upp úr klukan tíu.

„Menn voru hræddir um að það hefði opnast gat á hann og orðið leki,“ sagði Jóhann Þór. Svo hafi ekki orðið. 

„Það er búið að taka alla sýru úr laskaða tanknum. Við erum að undirbúa að hífa hann um borð og koma honum á öruggan stað,“ sagði hann. Fólki hafi aftur verið hleypt inn á höfnina í morgun.