Skýrsla tekin af frönsku konunni og búið að ræða við vitni

Ævar Pálmi Pálmason, yfirmaður á miðlægri rannsóknardeild lögreglunnar á höfuðborgarsvæðinu, staðfestir þetta við fréttastofu.

Unnið sé að því að skýra atburðarásina fyrir og eftir að andlátin áttu sér stað. Rætt hafi verið við gesti og starfsfólk hótelsins. Rannsókn miði ágætlega áfram en ekki sé tímabært að veita frekari upplýsingar.

Konan var úrskurðuð í vikulangt gæsluvarðhald í gær á grundvelli rannsóknarhagsmuna. Hún var flutt af vettvangi með alvarlega stunguáverka, en ástand hennar var stöðugt.

Hún hefur stöðu sakbornings í málinu og er grunuð um að hafa banað eiginmanni sínum og dóttur með eggvopni á hótelherbergi. Konan og maður hennar voru á sextugsaldri en dóttirin um þrítugt.