„Það er komin að­eins skýrari mynd“

Þetta segir Ævar Pálmi Pálmason, aðstoðaryfirlögregluþjónn miðlægrar rannsóknardeildar Lögreglunnar á höfuðborgarsvæðinu, í samtali við fréttastofu. Hann ítrekar þó að rannsókn málsins sé á frumstigi og mikil vinna sé fram undan.

Franska lögreglan kom þeirri íslensku í samband við aðstandendur

Í dag var greint frá því að lögreglumenn hefðu sett sig í samband við kollega sína í Frakklandi. Ævar Pálmi segir það hafa verið gert með fulltingi franska sendiráðsins á Íslandi.

Franska lögreglan hafi aðstoðað þá íslensku við að komast í samband við aðstandendur þeirra látnu. Hin látnu og konan sem grunuð er um að hafa ráðið þeim bana, hafi þó verið búsett á Írlandi og hafi komið þaðan í frí hér á landi.

Líkt og greint hefur verið frá er konan móðir sem grunuð er um að bana eiginmanni sínum og dóttur. Konan og maður hennar voru á sextugsaldri en dóttirin um þrítugt.

Fundust inni á herbergi

Ævar Pálmi segir að lík hinna látnu hafi fundist inni á hótelherbergi fjölskyldunnar. Hann geti ekki upplýst hvort það hafi verið á sama stað inni á herberginu. Þau hafi verið úrskurðuð látin á vettvangi.

Þá segir hann að stunguáverkar hafi verið á líkunum sem og á konunni en hann geti ekki upplýst hvers konar eggvopni var beitt. Þá geti hann ekkert gefið upp um eðli áverkanna á konunni.

Konan hefur réttarstöðu sakbornings í málinu og hefur verið úrskurðuð í gæsluvarðhald til og með föstudegi.