Embla Hrönn vann bráðabana og mætir Pamelu

Sindri Sverrisson skrifar 21. júní 2025 10:46

Pamela Ósk Hjaltadóttir lék langbest í höggleiknum á Íslandsmótinu í holukeppni. Á morgun hefst svo útsláttarkeppnin sjálf. golf.is/seth

Það þurfti fjögurra kvenna bráðabana til að skera úr um það hver fengi sextánda og síðasta sætið inn í útsláttarkeppnina á Íslandsmóti kvenna í holukeppni, á Hlíðavelli í Mosfellsbæ í gær.

Mótið átti upphaflega að hefjast viku fyrr, á Urriðavelli í Garðabæ, en var frestað um viku og fært um völl vegna ástands flata á Urriðavelli.

Heimakonan Pamela Ósk Hjaltadóttir lék langbest í höggleiknum og endaði hringina tvo samtals á pari, eftir að hafa leikið á -2 höggum í gær.

Næst á eftir henni kom Heiðrún Anna Hlynsdóttir úr Golfklúbbi Selfoss á +6 höggum, og þær Elsa Maren Steinarsdóttir og Eva Kristinsdóttir léku á +8 höggum.

Fjórir kylfingar voru jafnir í 16. sæti, þær Embla Hrönn Hallsdóttir, Elísabet Ólafsdóttir, Lilja Maren Jónsdóttir og Þóra Sigríður Sveinsdóttir, og því þurfti bráðabana þeirra á milli.

Þar vann GKG-ingurinn Embla Hrönn og hún mætir því Pamelu í 16-manna úrslitunum. Þau hefjast þó ekki fyrr en á morgun, þegar 16- og 8-manna úrslit kvenna fara fram, og undanúrslit og úrslit verða svo á mánudaginn.

Í dag verður hins vegar spilaður 36 holu höggleikur hjá körlunum, sem kominn er af stað, og þeir spila svo 16- og 8-manna úrslit á morgun, og undanúrslit og úrslit á mánudag, líkt og konurnar.

Golf