Fundað á Al­þingi fram á nótt og fram­hald strax klukkan tíu

Ummæli Kristrúnar Frostadóttur forsætisráðherra í Kastljósi Ríkisútvarpsins í gærkvöldi urðu svo til þess að þingmenn stjórnarandstöðunnar gerðu harða hríð að ráðherra og sökuðu um skammarleg og ómakleg ummæli. Í viðtalinu sagði Kristrún meðal annars að orðræða minnihlutans á þingi um veiðigjöldin hafi verið í falsfréttastíl. Verið væri að hræra í pottinum „til þess að skapa ótta, til þess að skapa óvissu.“

Þegar þingmenn stjórnarandstöðunnar heyrðu þessi ummæli forsætisráðherra voru þau tekin óstinnt upp og hún krafin um skýringar. Guðrún Hafsteinsdóttir formaður Sjálfstæðisflokksins skrifaði einnig grein á Vísi í morgun þar sem ummæli Kristrúnar eru harðlega gagnrýnd.

Enginn ríkisstjórnarfundur er boðaður í dag eins og þó er venja fyrir á þriðjudögum en þingfundi verður hinsvegar fram haldið strax klukkan tíu, sem er óvenju snemmt.

Þar eru veiðigjöldin áfram á dagskrá en einnig stendur til að ræða frumvarp um stuðning við einkarekna fjölmiðla og kílómetragjald á ökutæki, en bæði þessi stjórnarmál eru í annarri umræðu.