Fótbolti

„Ég er mjög sátt og þið verðið bara að bíða spennt“

Aron Guðmundsson skrifar
Karólína Lea Vilhjálmsdóttir er stödd með íslenska landsliðinu á EM í Sviss þar sem að Ísland spilar sinn fyrsta leik gegn Finnlandi á miðvikudaginn kemur.
Karólína Lea Vilhjálmsdóttir er stödd með íslenska landsliðinu á EM í Sviss þar sem að Ísland spilar sinn fyrsta leik gegn Finnlandi á miðvikudaginn kemur. Vísir/Anton Brink

Það bendir allt til þess að íslenska landsliðskonan Karólína Lea Vilhjálmsdóttir verði leikmaður ítalska stórliðsins Inter Milan á næstunni. Hún virðist búin að taka ákvörðun um næsta skref á sínum ferli og er afar sátt við niðurstöðuna.

Karólína er samningsbundin Bayern Munchen til ársins 2026 en hefur verið síðustu tvö tímabil á láni hjá Bayer Leverkusen. Ítalska stórliðið þarf því að leggja fram fé og festa kaup ef það vill klófesta Karólínu.

Klippa: Karólína Lea búin að ákveða næsta skref

„Ég er samningsbundin Bayern Munchen núna en get sagt að framtíð mín mun ráðast á næstu dögum,“ sagði Karólína í samtali við Sindra Sverrisson á hóteli íslenska landsliðsins í Thun í Sviss þar sem að framundan er fyrsti leikur landsliðsins á komandi Evrópumóti á miðvikudaginn kemur gegn Finnlandi.

Þannig að þú ert að fara tilkynna þetta á mótinu?

„Það gæti gerst,“ sagði Karólína brosandi.

Ertu sátt við niðurstöðuna?

„Já ég er mjög sátt og þið verðið bara að bíða spennt eftir því hver sú niðurstaða var.“

Inter hefur góða reynslu af Íslendingum því liðsfélagi og vinkona Karólínu úr landsliðinu, Cecilía Rán Rúnarsdóttir, varði mark Inter í vetur sem lánsmaður frá Bayern og var valin besti markvörður ítölsku A-deildarinnar. Cecilía er líkt og Karólína samningsbundin Bayern til 2026 en sterkur orðrómur hefur verið um að Inter muni í sumar festa kaup á henni.

Landslið kvenna í fótbolta EM 2025 í Sviss Íslendingar erlendis Fótbolti

Mest lesið


Fleiri fréttir

Sjá meira


×

Mest lesið