„Mér fannst við al­veg halda þeim í skefjum“

„Mér leið ótrúlega vel og fannst ég sýna hvað ég get. Hefði viljað halda hreinu en það kemur bara í næsta leik“ sagði Cecilía fljótlega eftir leik, hún var maður leiksins að mati íþróttadeildar Vísis.

Ísland lenti í áföllum þegar fyrirliðinn Glódís Perla þurfti að fara af velli í hálfleik og aftur í seinni hálfleik þegar Hildur Antonsdóttir var rekin af velli.

„Alltaf erfitt þegar við missum mann út og erum einum færri en mér fannst við samt sýna ótrúlegan karakter og stíga upp. En síðan skorum við bara ekki og fáum á okkur mark. Mér fannst við fá nokkur tækifæri til að skora og áttum ekki að fá á okkur mark.“

Finnland ógnaði mikið upp vinstri vænginn, á hægri hlið íslensku varnarinnar og Cecilía var því spurð hvað gekk ekki þeim megin.

„Ég veit ekki alveg hvað var ekki að ganga upp. Mér fannst við alveg halda þeim í skefjum þangað til hún kemst einu sinni framhjá og skorar. Alltaf erfitt að spila á móti svona góðum leikmönnum sem vilja keyra inn á völlinn. En við verðum bara að fara yfir leikinn og sjá hvað við getum gert betur.“

Fátt var um svör og lausnir þegar litið var á heildarframmistöðu liðsins, það þarf einfaldlega að gera betur.

„Það þarf bara að gera betur, ég væri bara til í að sjá leikinn aftur og sjá hvað við getum gert betur. Alltaf erfitt að segja eftir leiki þegar tilfinningarnar eru miklar.“

„Þetta er aðallega bara mjög leiðinlegt en við verðum bara að vinna seinni tvo leikina. Ég held að það hefði verið sama ef við hefðum gert jafntefli eða unnið, það var alltaf markmiðið okkar að vinna seinni tvo leikina“ sagði Cecilía að lokum.